“Мутлақо қабул қилиб бўлмайди”. Трамп Эрон таклифини қоралади

АҚШ Президенти Дональд Трамп Эроннинг янги тинчлик таклифларини кескин рад этди. Бу ҳақда у ўзининг Truth Social саҳифасида ёзиб қолдирди.

У янги таклиф лойиҳасини “буни мутлқо қабул қилиб бўлмайди” дея ёзган.

Маълумотларга кўра, Эрон АҚШга кўп саҳифали режа юборган. Ҳужжат Покистон орқали етказилган.

“The Wall Street Journal”нинг ёзишича, Теҳрон ядровий дастур бўйича бир ойлик музокараларни бошлашни, Ҳормуз бўғозини босқичма-босқич очишни ва юқори бойитилган уран захираларининг бир қисмини учинчи давлатга беришни таклиф қилган. Эвазига АҚШдан денгиз блокадасини бекор қилиш ва санкцияларни юмшатиш сўралган.

Шу билан бирга, Эрон ўз ядровий объектларини демонтаж қилишдан бош тортган. Шунингдек, уранни бойитишни вақтинча тўхтатишга тайёрлигини билдирган, аммо АҚШ таклиф қилган 20 йиллик мораторийга рози бўлмаган.

Эроннинг “Tasnim” агентлиги эса Трампнинг муносабати Теҳрон учун “ҳеч қандай аҳамиятга эга эмаслиги”ни билдирган. Манбага кўра, Эрон музокараларда фақат ўз миллий манфаатларидан келиб чиқади.

“Tasnim” аггентлигига кўра, Эроннинг асосий талаблари — урушни дарҳол тўхтатиш, денгиз блокадасини бекор қилиш, Ҳормуз бўғози устидан назоратни сақлаб қолиш ва 30 кун ичида нефть санкцияларини олиб ташлашдан иборат.

Аввалроқ, Трамп АҚШ ва Эрон ўртасидаги музокараларни “жуда яхши” деб атаган ва Теҳрон ядровий қуролдан воз кечишга рози бўлганини айтган эди.