Москвадан Тошкентга учган эркак самолётда йўловчи аёлга шилқимлик қилди

Жорий йилнинг 21 июль куни Москва-Тошкент йўналишидаги авиарейсда маст ҳолатда аёл йўловчига нисбатан шаҳвоний хатти-ҳаракатлар содир қилган фуқаро 3 суткага қамалди. QALAMPIR.UZ суд ҳужжати билан танишди. 

Ҳужжатда қайд этилишича, 1985 йилда Қирғизистонда туғилган, Ўзбекистон фуқароси бўлган эркак рейс давомида йўловчи аёлга бир неча бор тегиниб, номақбул ҳаракатлар қилган. Аёл унга огоҳлантириш берган, аммо эркак шунга қарамай ўз ҳаракатларини давом эттирган. 

Эркакнинг ҳаракатларига самолёт стюардессаси гувоҳ бўлган. 

Судланувчи қилган ишидан пушаймонлигини билдирган ва маст ҳолатда бўлгани сабабли ўзини тутолмаганини айтган.

Суд эркакнинг ижтимоий ҳолатини инобатга олиб, Маъмурий жавобгарлик тўғрисидаги кодекснинг 41¹-моддаси (шаҳвоний шилқимлик қилиш) 1-қисми билан 3 сутка маъмурий қамоқ жазоси тайинлаган. Шу билан бирга, эркак қамоқда сақлаш харажатларидан озод этилган. 

Эслатиб ўтамиз, аввалроқ Наманган вилоятида 34 ёшли Damas ҳайдовчиси машинасига йўловчи сифатида чиққан қизга шаҳвоний шилқимлик қилгани учун жазоланганди.