Москва яқинидаги бинода ёнғин: қурбонлар сони ортиб бормоқда

Москва яқинидаги Фрязино шаҳридаги офис биносида содир бўлган ёнғин оқибатида ҳалок бўлганлар сони саккиз кишига етди. Бу ҳақда фавқулодда хизматларга таяниб, Россия ОАВлари хабар берди.

“Яна бир жабрланувчи шифохонада оғир аҳволда”, дейди Москва вилояти губернатори Андрей Воробёв.

Аввалроқ расмийлар қочишга уриниб, деразадан сакраб тушган икки киши ҳалок бўлганини маълум қилган эди.

Илгари “Платан” илмий-тадқиқот институти эгаллаб турган саккиз қаватли бинодаги ёнғин кеча, 24 июнь куни содир бўлган. Ёнғин бешинчи-саккизинчи қаватларни қамраб олган. Фавқулодда вазиятлар вазирлиги хабарига кўра, тўққиз киши бино ичида қолиб кетган.

Оператив хизматларнинг дастлабки маълумотларига кўра, ёнғинга электр тармоғининг аварияли ишлаши сабаб бўлган.

Кейинроқ ёнаётган бинода кислород баллонлари портлаган. Бу шифтларнинг қулашига олиб келган.

“Ёнғин тарқалишига лифт шахтаси ва ҳаво ўтказгичларининг жойлашуви ёрдам берди”, деб тушунтирди вилоят раҳбари.

Ёнғинни ўчиришда фавқулодда вазиятлар хизматининг ўнлаб ходимлари ва ўнлаб техника воситалари, жумладан, иккита вертолёт иштирок этди.

Москва вақти билан соат 22:00 да очиқ ёниш ўчирилди. Россия Тергов қўмитасининг Москва вилояти бўйича бошқармаси эҳтиётсизлик оқибатида ўлимга сабаб бўлганлик бўйича жиноий иш қўзғатди.