Мирзиёев Жанубий Корея Президенти билан учрашиб, уни Ўзбекистонга таклиф қилди

Ўзбекистон Президенти Шавкат Мирзиёев кеча, 23 сентябрь куни Нью-Йорк шаҳрида БМТ Бош Ассамблеясининг сессияси доирасида Корея Республикаси Президенти Ли Чжэ Мён билан учрашув ўтказди. Бу ҳақда Ўзбекистон раҳбарининг матбуот хизмати хабар берди.

Учрашув давомида Ўзбекистон-Корея алоҳида стратегик шериклик муносабатларини янада мустаҳкамлаш ва кўп қиррали ҳамкорликни кенгайтириш масалалари кўриб чиқилган.

Кейинги йилларда ўзаро ҳамкорликда катта юксалишга эришилгани, барча даражалардаги алмашинув ва мулоқотлар жадаллашгани мамнуният билан қайд этилган.

Қолаверса, Корея халқаро ҳамкорлик агентлиги, Корея Эксимбанки ва унинг фондлари билан кўп йиллар давомида самарали шериклик қилиб келинаётгани, лойиҳаларнинг умумий портфели 3,5 миллиард долларга етганига юксак баҳо берилган.

Муҳим хомашё ресурсларини чуқур қайта ишлаш, кимё, машинасозлик, қишлоқ хўжалиги, транспорт, авиация, биотехнологиялар ва бошқа устувор йўналишлардаги лойиҳаларни илгари суришни назарда тутадиган янги узоқ муддатли технология ва саноат шериклиги дастурини тайёрлаш юзасидан келишувга эришилган.

Шу билан бирга, ҳукуматлараро комиссиянинг бўлажак йиғилишини самарали қилиб ўтказиш муҳимлиги қайд этилган.

Минтақавий, шу жумладан, “Марказий Осиё - Корея Республикаси“ форматида ҳамкорлик масалалари юзасидан фикр алмашилган.

Учрашув якунида Ўзбекистон раҳбари Корея Президентини давлат ташрифи билан Ўзбекистонга келишга таклиф қилган.

Эслатиб ўтамиз, кеча, 23 сентябрь куни Ўзбекистон Президенти Шавкат Мирзиёев ва Америка Қўшма Штатлари Президенти Дональд Трампнинг музокаралари бўлиб ўтганди. Етакчилар Ўзбекистон-АҚШ стратегик шериклик муносабатларини янада кенгайтиришнинг долзарб масалалари ва устувор йўналишларини батафсил муҳокама қилган.