Мирзиёев Эрдўғанни Туркиянинг 100 йиллиги билан табриклади

Ўзбекистон Республикаси Президенти Шавкат Мирзиёев Туркиянинг миллий байрами – Республика эълон қилинган куннинг 100 йиллиги муносабати билан Президент Ражаб Тойиб Эрдўғанга табрик йўллади. Бу ҳақда Президент матбуот хизмати хабар берди. 

Маълум қилинишича, Ўзбекистон раҳбари мактубда Туркия етакчиси ва оила аъзоларига сиҳат-саломатлик, фаровонлик ва бахт-саодат, масъулиятли давлатчилик фаолиятида янги зафарлар, қардош турк халқига эса тинчлик-омонлик, бардавом тараққиёт ва юксалишлар ёр бўлишини тилаган.

“Насиб этса, сиз билан биргаликда халқларимизнинг умумий равнақини таъминлаш йўлида келишиб олган барча йирик лойиҳа ва аниқ дастурларни тўлиқ амалга оширамиз ҳамда кўзлаган улкан марраларимизга албатта эришамиз”, деган Мирзиёев.

Шунингдек, қутловда икки халқ ўртасидаги умумий тил ва урф-одатлар, ўзаро ҳурмат ва ҳамжиҳатлик тамойилларига асосланган кенг қамровли стратегик шериклик алоқаларининг сўнгги йилларда сифат жиҳатидан юқори босқичга кўтарилиб, Ўзбекистон-Туркия муносабатларида янги тарихий давр бошлагани қайд этилган.

Маълумот учун, 1923 йил 29 октябрда Мустафо Камол Отатурк Туркияни Республика деб эълон қилган ва унинг расмий номини (туркча: Türkiye Cumhuriyeti) Туркия Республикасига ўзгартирган. Шундан сўнг Туркия Буюк Миллат Мажлисида овоз бериш бўлиб ўтиб, унинг натижаларига кўра Мустафо Камол Отатурк Туркия Республикасининг биринчи Президенти этиб тайинланган.

Айтиш жоиз, Туркия 1920 йилнинг 23 апрелида – Туркия Буюк Миллат Мажлиси (парламенти) ташкил этилгандан бери амалда республика бўлган, бироқ Туркия Республикасининг расмий эълон қилиниши орадан уч ярим йил ўтибгина содир бўлган. Шу кундан бошлаб бу сана мамлакатда миллий байрам – Республика (Жумҳурият) куни  сифатида нишонлаб келинади.