“Милан” Аллегрини истеъфога чиқарди

“Милан” клуби бош мураббийи Массимилиано Аллегри ўз лавозимидан озод этилди. Бу ҳақда клуб матбуот хизмати хабар берди. 

“Ўтган мавсумдаги омадсизликдан кейин клуб олдига аниқ мақсад қўйилган эди — Чемпионлар лигасига қайтиш ва А Серия юқори поғоналарида барқарор ўрин эгаллаш учун мустаҳкам пойдевор яратиш. Мавсумнинг катта қисмида биз кучли иккилик сафида бўлдик ва “Скудетто” учун курашиш имкониятига эга эдик. Бироқ мавсум кутилганидан анча паст даражада якунланди ва сўнгги турдаги мағлубият бу мавсумни тўлиқ муваффақиятсизликка айлантирди. Энди ўзгаришлар қилиш ва клуб спорт бўлимини чуқур қайта ташкил этиш вақти келди”, дейилади “Милан” клуби баёнотида.

Жорий йилнинг 24 май куни “Милан” А Сериянинг сўнгги — 38-тур учрашувида ўз майдонида “Кальяри”га 2:1 ҳисобида мағлуб бўлди. Натижада жамоа турнир жадвалида бешинчи ўринни эгаллаб, келаси мавсум учун Чемпионлар лигаси йўлланмасини қўлга кирита олмади. “Россонери” энди Европа лигасида иштирок этади.

Аллегри билан бирга клуб бош директори Жоржио Фурлани, спорт директори Игли Таре ва техник директор Жеффри Монкада ҳам жамоани тарк этди.

Маълумот учун, 58 ёшли Массимилиано Аллегри 2025 йил июль ойида иккинчи марта “Милан” бош мураббийига айланган эди. У бундан аввал 2010–2014 йилларда ҳам “россонери”ни бошқарган.