“Мессипараст” ўғри Роналдунинг уйини ўмаргани ҳақида айтиб берди
Спорт
−
09 Ноябрь 2023
4188Испаниянинг “El Espanol” нашри 20 йилдан ортиқ вақт мобайнида машҳур инсонларнинг уйларига ўғирликка тушган косово-албан гуруҳи раҳбари Альберто билан суҳбатни чоп этди. Альбертонинг гуруҳида жами 100 дан ортиқ одам мавжуд бўлиб, “соҳа вакиллари” кўплаб футболчилар, хусусан, Криштиану Роналду, Карим Бензема ва Йохан Кройффнинг уйларини тунаган.
“Мен Йохан Кройффнинг Барселонадаги уйига ўғирликка тушганман. У ердан Деннис Бергкампнинг соати, Hermes'нинг бир нечта буюмлари ва 20 минг евролик кубокни ўмарганман. Кройффнинг уйида на видеокузатув камералари, на сигнализация бор эди. Уйга кирганимдан кейингина бу ерда Йохан Кройфф яшашини билганман”, дейди Альберто.
Шунингдек, жиноий гуруҳ раҳбари Мадейрадаги Криштиану Роналдунинг уйига ҳам ўғирликка тушганини ҳикоя қилди.
Маълум бўлишича, ўғрининг португалиялик футболчининг уйидаги “ови” бароридан келмаган.
Шунингдек, Альберто ўз соҳасига оид айрим нозик сирларни ҳам ошкор қилган. Унинг сўзларига кўра, ўғриларга зарур маълумотлар “қурбонлар”га яқин одамлар томонидан тақдим этилади. Мукофот сифатида “қадрдонлар”га ўлжанинг 30 фоизи берилади.
“Ижтимоий тармоқлар машҳурлар учун биринчи рақамли душмандир. Агар кимдир менга маълумотларни айтмаса, Испанияда ҳеч қандай ўғриликни амалга ошира олмайман. Маълумот бериб турадиган одамлар мен учун қадрлидир. Бизга ёрдам берадиган кишилар “қурбонлар”ни яқиндан биладиган одам, уларнинг хизматкори ва ҳатто дўсти бўлиши мумкин”, дейди Альберто.
Бундан ташқари, ўғри аргентиналик футболчи Лионель Месси ПСЖда ўйнаб юрган вақтида унинг Каталониядаги уйини ўғирлашдан бош тортганини айтди. Жиноятчи Мессини ҳурмат қилиши сабабли унинг мулкига тегмаган.
“Мессини тунамоқчи бўлганларни бир неча бор тўхтатдим ва бундан фахрланаман. Ҳужумчини ҳурмат қилганим учун унинг бойлигига "кўз олайтирмаганман“, дейди ўғрилар бошлиғи.