Мессининг қўриқчиси жиддий баёнот билан чиқди (видео)

“Интер Майами” клуби ва Аргентина терма жамоаси ҳужумчиси Лионель Мессининг шахсий қўриқчиси Яссин Чуэко ижтимоий тармоқда Чуэко Мессига етиб боришига тўсқинлик қилмоқчи бўлган мухлиснинг майдонга югуриб чиқиб, уни йиқитгани акс этган видеога муносабат билдирди.

“Гондурас ва Перудаги стадионларнинг хавфсизлик ходимларига профессионаллиги ва ёрдами учун самимий миннатдорлик билдирмоқчиман. Мухлисларни майдонга тушишини тўхтатиш менинг ишим эмас. Бу стадион хавфсизлик ходимларининг зиммасида. Аммо ростини айтайлик, уларнинг аксарияти ўз вазифаларига тўлиқ эътибор қаратмайди. Хавфсизликни таъминлаш ўрнига, улар ўйинни томоша қилиш ёки фотосурат ва видео олиш билан банд. Ва улар эътибор бермаётгани учун мен ўз ташаббусим билан аралашиб, бундай ҳолат бўлган тақдирда вазиятни ҳал қилишга қарор қилдим”, дейди Чуэко.

Қўриқчи, шунингдек, хавфсизлик ходимларини доимий ҳушёрликка чақирди.

“Илтимос, хавфсизлик хизмати ходимлари, сиздан ҳурмат ва жиддийлик билан сўрайман: ҳушёр бўлинг. Сизга маош тўлайдиган ишни бажаринг. Стадион, футболчилар ва мухлислар хавфсизлиги сизга боғлиқ. Мен ҳар доим сизни қўллаб-қувватлашга тайёрман. Аммо агар сиз ўз вазифангизни бажармасангиз, бу вазифани бир ўзим ҳал қилишим жуда қийин бўлади. Мен машҳур эмасман ва менда эго йўқ. Айрим оммавий ахборот воситалари таъкидлаганидек, мен йилига 3 миллион доллар ишлаб олмайман. Мен ҳам миллионлаб одамлар каби ўз вазифамни масъулият ва ғурур билан бажариш учун ҳар куни бор кучимни сарфлайдиган ишчиман. Менинг вазифам – мен ишлаётган одамларнинг хавфсизлигини таъминлаш. Мен кроссовкада майдон бўйлаб югуришга тайёрман. Менга ўз образим эмас, вазифам муҳим. Ва агар бир кун келиб бурчимни бажариш учун жонимни беришга тўғри келса, буни ҳеч иккиланмай бажараман”, дейди Чуэко.

Маълумот учун, Чуэко Ироқ ва Афғонистонда жанговар тажрибага эга, жанг санъатлари бўйича машғулотлар ва бир нечта ММА жангларида қатнашган собиқ АҚШ армияси махсус кучлари аскаридир.