Месси учун 500 млн евро: кутилмаган трансфер тафсилотлари очиқланди

Италиянинг “Интер” жамоаси собиқ президенти Массимо Моратти 2012 йилда Лионель Мессини “Барселона”дан сотиб олиш учун 500 миллион евро сарфлашга тайёр бўлганини маълум қилди.

Мораттининг сўзларига кўра, бу сумма ўша пайтдаги футбол бозори мезонлари бўйича ҳам жуда катта эди. Шунга қарамай, у музокараларни бошлаш учун “Интер” вице-президентини Барселонага юборган.

Бироқ келишув амалга ошмаган. Мораттининг айтишича, Месси молиявий шартларни муҳокама қилишга ҳам киришмасдан таклифни рад этган. Аргентиналик футболчининг позицияси аниқ бўлган: у “Интер”нинг қизиқишини қадрлаган, аммо фаолиятини “Барселона”да якунлашни истаган.

Месси охир-оқибат 2021 йилга қадар каталонияликлар клубида қолди. Унинг “Барселона”даги узоқ йиллик фаолияти клуб янги шартнома тузиш имконига эга бўлмаганидан сўнг якунланди. Шундан кейин футболчи “Пари Сен-Жермен”га, кейин эса АҚШга кўчиб ўтди.

Айни пайтда Месси “Интер Майами” сафида тўп тепмоқда. MLS клуби аргентиналик футболчи билан шартномани 2028 йилги мавсум охирига қадар амал қилади.