Месси Миср билан ўйиндан кейин нега йиғлаганини айтди

Аргентина миллий терма жамоаси ҳужумчиси Лионель Месси Жаҳон чемпионатининг 1/8 финал босқичида Миср устидан қозонилган иродали ғалабадан кейин қувонч ва енгилликдан кўз ёшларини тия олмаганини айтди. Бу ҳақда Месси ўйиндан кейин журналистларга берган интервьюсида сўз очди.

Кеча, 7 июль куни Аргентина Миср устидан 3:2 ҳисобида ғалаба қозонган учрашувдан сўнг Мессининг финал ҳуштагидан кейин ҳиссиётларини жиловлай олмаганди. Бу учрашувда Аргентина терма жамоаси баҳснинг 79-дақиқасига қадар 0:2 ҳисобида ортда бораётганди.

Журналистлар Мессидан бу унинг миллий жамоа сафидаги сўнгги ўйини бўлиши мумкинлиги ҳақидаги ўйлар туфайли йиғлаган-йиғламаганини сўрашди.

“Йўқ. Бу кўз ёшлари қувонч ва енгилликдан эди. Биз курашни давом эттиришни жуда хоҳлардик ва буни бугун тугашини истамасдик. Ўйин давомида жуда кўп нарса содир бўлди, катта меҳнат қилдик. Менимча, бу жамоа курашни давом эттиришга муносиб эди. 0:2 ҳисобида ортда бораётган ҳолатдан қайтиш осон эмас. Аммо мен ҳар доим айтганман бу жамоа ҳеч қачон таслим бўлмайди”, дейди Месси.

Маълумот учун, амалдаги жаҳон чемпиони Аргентина чорак финалда Швейцарияга қарши майдонга тушади.

2026 йилги Жаҳон чемпионати АҚШ, Канада ва Мексикада бўлиб ўтмоқда. Турнир тарихида илк бор 48 та терма жамоа иштирок этмоқда. Мусобақа жорий йилнинг 19 июль куни якунига етади.