Месси хоҳласа, ҳали ҳам дунёнинг энг яхши футболчиси бўла олади – Скалони

Аргентина миллий терма жамоаси бош мураббийи Лионель Скалони жамоа сардори Лионель Мессининг 39 ёшида ҳам юқори даражада ўйин кўрсатаётгани уни ҳайратга солмаслигини айтди. Бу ҳақда Скалони Швейцарияга қарши учрашув олдидан ўтказилган матбуот анжуманида сўз очди.

Мутахассиснинг айтишича, Месси фаолиятини давом эттиришни истар экан, ҳамон дунёнинг энг яхши футболчиси бўлиб қолади.

“Лео деярли ҳар бир ўйинда бир хил ҳажмда ҳаракат қилади. У жисмоний тайёргарлик бўйича мураббий билан катта иш олиб борди ва бу ўз самарасини берди. У майдонда ўз имкониятларини тўлиқ ишга солади. Қачон хавф туғдириш мумкинлигини ҳис қилса, ҳақиқий машинага айланади”, дейди Скалони.

Месси ушбу мундиалда Миср ва Австрияга қарши ўйинларда пенальтиларни аниқ амалга ошира олмаганига қарамай, Скалони ундан пенальти тепиш ҳуқуқини олишни ҳатто ўйламаганини билдирган.

“Унга кейинги пенальтини тепма, деб айтиш хаёлимга ҳам келмаган. Жамоада бу вазифани бажара оладиган бошқа футболчилар ҳам бор. Аммо агар Лео хоҳласа, пенальтини ўзи тепади. Майдонда у хоҳлаган қарорини қабул қилиши мумкин”, дейди Аргентина устози.

Мушак жароҳатидан тикланганидан кейин олтинчи Жаҳон чемпионатига борган Мессининг жисмоний ҳолати ҳақида фикр билдирган Скалони унинг тайёргарлигини юқори баҳолаган.

Скалонининг фикрича, Мессининг ёши унинг ўйинига салбий таъсир кўрсатишини кутаётганлар футболчини яхши билмайди.

“Бу мени ажаблантирмайди. Балки уни яхши танимайдиганлар 39 ёшида бундай даражада ўйнай олмайди, деб ўйлашгандир. Мен буни неча марта айтганимни билмайман: агар Месси хоҳласа, у ҳали ҳам энг яхшиси бўлади. Буни фақат унинг мураббийи бўлганим учун айтмаяпман”, дейди Скалони.

Аргентина терма жамоаси чорак финалда Швейцарияга қарши майдонга тушади. Учрашув эртага, 12 июль куни Канзас-Сити шаҳрида бўлиб ўтади. Агар Аргентина чорак финалда Швейцарияни мағлуб этса, ярим финалда Англия ёки Норвегия терма жамоаси билан куч синашади.

Маълумот учун, Месси 2026 йилги Жаҳон чемпионатида Аргентина терма жамоасининг асосий етакчисига айланди. У бешта учрашувда 8 та гол уриб, “Олтин бутса” учун курашда Франция ҳужумчиси Килиан Мбаппе билан бирга курашмоқда.