Месси Аргентинада хайрлашув учрашувини ўтказади

Саккиз карра “Олтин тўп” соҳиби Лионель Месси хайрлашув учрашувида иштирок этиш учун Аргентина терма жамоасига чақирилди. Бу ҳақда Аргентина футбол ассоциацияси матбуот хизмати хабар берди.

Жорий йилнинг 31 август куни Месси Аргентина терма жамоасидаги фаолиятини якунлашини маълум қилган эди. Аргентиналиклар жорий йилнинг 30 сентябрь куни Боливия, 3 октябрь куни Буркина-Фасо ва 6 октябрь куни Бенинга қарши ўртоқлик учрашувларида майдонга тушади. Месси сўнгги учрашув олдидан жамоа ихтиёрига келиши кутилмоқда.

“Биз дунёнинг энг яхши футболчиси, капитанимиз Лионель Мессини 6 октябрь куни Аргентинада ўйнашга ва унга муносиб хайрлашув маросимини ташкил этишга таклиф қилдик”,  дейди Аргентина футбол ассоциацияси президенти Клаудио Тапиа.

Маълумот учун, 39 ёшли Месси 2023 йилдан буён Шимолий Америка Олий футбол лигаси (MLS) вакили “Интер Майами” сафида тўп тепиб келмоқда. Европада эса аргентиналик ҳужумчи Франциянинг “Пари Сен-Жермен” ва Испаниянинг “Барселона” клубларида ўйнаган.

Месси “Барселона” билан тўрт марта Чемпионлар лигаси, уч мартадан UEFA Суперкубоги ва клублар ўртасидаги Жаҳон чемпионатида ғолиб чиққан.

Ҳужумчи 2022 йилги Жаҳон чемпионати ғолиби, 2014 ва 2026 йилларда Жаҳон чемпионатида иккинчи ўрин соҳиби, 2008 йилги Олимпиада чемпиони ҳамда 2021 ва 2024 йилларда Америка Кубоги ғолиби ҳисобланади.

Месси “Олтин тўп” мукофотини энг кўп қўлга киритган футболчи ҳисобланади. У Аргентина терма жамоаси сафида 207 та учрашувда майдонга тушиб, 125 та гол урган. Ҳар икки кўрсаткич бўйича ҳам у миллий жамоа рекордчиси ҳисобланади.