Месси 2030 йилги ЖЧда иштирок этадими?

Аргентина терма жамоаси бош мураббийи Лионель Скалони миллий жамоа сардори Лионель Месси яна бир Жаҳон чемпионатида иштирок этса, бундан ҳайратланмаслигини айтди. Бу ҳақда Скалони финал олдидан ўтказилган матбуот анжуманида сўз очди.

“Бу Месси учун сўнгги Жаҳон чемпионатими? Буни қаердан билай? Бу саволни унинг ўзига беришингиз керак. Мен бу ҳақда ҳеч нарса билмайман, чунки у ҳеч қачон ҳайратлантиришдан тўхтамайди. Бу фақат унинг ўзига боғлиқ. Шундай бўлган тақдирда ҳам бу мени ажаблантирмайди”, дейди Скалони.

Месси АҚШ, Канада ва Мексика мезбонлик қилаётган мундиалда ўзининг олтинчи Жаҳон чемпионатида иштирок этмоқда. 2022 йилда аргентиналиклар жаҳон чемпиони бўлган, ўша мусобақада Месси еттита гол урган эди.

Жорий чемпионатда Аргентина финалгача етиб келди. 39 ёшли Месси саккизта гол билан турнир тўпурарлари пойгасида пешқадам бўлиб турибди.

“39 ёшида Жаҳон чемпионати финалига чиқиш — ақл бовар қилмас натижа. Шунинг учун ҳам мен бу лаҳзалардан завқланишимиз, унинг қилаётган ишларини қадрлашимиз кераклигини айтганман. У ҳақиқий тарих ва афсона. Шунингдек, бизни бу ажойиб кунларга олиб келган бутун жамоа ҳам шундай эътирофга лойиқ”, дея қўшимча қилган мураббий.

Жаҳон чемпионати финалида Аргентина терма жамоаси эртага, 19 июль куни Нью-Жерси шаҳрида Испанияга қарши майдонга тушади.