Мерц кутилмаганда Киевга борди

Бугун, 4 октябрь эрталаб Германия канцлери Фридрих Мерц махсус поездда Киевга борди. Ушбу ташриф ҳақида олдиндан эълон қилинмаган эди. Бу ҳақда Украина Ташқи ишлар вазирлиги хабар берди.

Қайд этилишича, Германия етакчисини Украина Ташқи ишлар вазири Андрей Сибига кутиб олган. Мерц Президент Владимир Зеленский билан икки томонлама, Европа ва халқаро кун тартибининг барча йўналишлари бўйича музокаралар ўтказади.

“Мен бугун Киевга келдим, чунки яқин ҳафталарда Украинага бизнинг қўллаб-қувватлашимиз керак бўлади. Агар Россия тўхтатилмаса, эртaми-кечми унинг ҳарбий машинаси бизга қарши қаратилади”, дейди Мерц.

Шунингдек, у Россия Президенти Владимир Путин “шаҳарларни, тураржойларни ва иссиқлик электр станцияларини бомбардимон қилаётганини” айтган.

У билан бирга Киевга Германия Иқтисодиёт ва энергетика вазири Катерина Райхе ҳамда ўнта тадбиркор, жумладан, Siemens Energy, Hensoldt, Diehl Defence ва Quantum Systems мудофаа компаниялари раҳбарлари борган. Режага кўра, Германия биринчи навбатда Украинага реактив дронлардан ҳимояланишга ёрдам беради. “dpa”нинг ҳукуматдаги манбаларига кўра, Мерц тез орада “минглаб” тутувчи дронлар етказиб берилишини эълон қилади.

Шу билан бирга, Украина 1000 кмдан ортиқ масофадаги Россия фронторти таъминот тизимларига зарба бериши мумкин бўлган узоқ масофали қуроллар ишлаб чиқаришни кўпайтириши режалаштирилган. Бунинг учун ажратиб бўлинган бюджет маблағларидан 1 миллиард евро йўналтирилиши кўзда тутилган. Яна 350 миллион евро вайрон қилинган электр станцияларини қайта тиклашга мўлжалланган. Мерцнинг фикрича, Россия фақат “куч тили”ни тушунади, шу сабабли у Зеленскийга Украина Германиянинг ёрдамига бундан буён ҳам умид қилиши мумкинлигини шахсан айтишга қарор қилган.

Маълумот учун, Мерц учун бу канцлер сифатида Киевга учинчи ташриф. У илк бор Украина пойтахтига 2025 йилда қасамёд қабул қилганидан бор-йўғи тўрт кун ўтиб борган эди. Иккинчи ташриф 2025 йилнинг октябрь ойида бўлиб ўтган. Иккала сафарда ҳам Мерц Украинага Франция Президенти Эммануэль Макрон, Буюк Британиянинг ўшандаги бош вазири Кир Стармер ва Польша ҳукумати раҳбари Дональд Туск билан бирга ташриф буюрган эди.

Қайд этиш жоиз, ушбу ташриф Россия Мудофаа вазирлиги хорижий дипломатлар ва фуқароларни янги оммавий зарбалар қурбони бўлмаслик учун Киевни тарк этишга чақирган куннинг эртасига амалга оширилди. Сўнгги ҳафталарда Украина пойтахти деярли тўхтовсиз ҳужумларга учрамоқда. Бугун, 4 октябрь куни Россия ҳарбийлари Шимолий кўприкка зарба беришда давом этди. 

Эслатиб ўтамиз, аввалроқ Владимир Зеленский “Reuters”га берган интервьюсида Украина армияси Россия армиясининг янги тактикасига жавобан Россия нефтни қайта ишлаш заводларига бериладиган зарбаларни кучайтириши ҳақида хабар берилган эди.