“Мен учун шок бўлди”. Роналдунинг онаси можаро ҳақида гарирди

Криштиану Роналдунинг онаси Долорес Авейру фаолияти давомида ҳам мамлакати, ҳам миллий терма жамоаси учун катта ҳисса қўшган футболчига Португалиядаги муносабатни адолатсиз деб ҳисоблайди. Бу ҳақда Авейру “TV7 Dias” нашрига берган интервьюсида сўз очди.

“Мен хафа бўлдим, бу табиий ҳолат. Бу мен учун шок бўлди. Ўғлим терма жамоани олд эшикдан чиқиб тарк этиши мумкин эди, аммо у орқа эшикдан чиқиб кетди. Лекин бу ҳам майли, ҳаммасини Худо ҳал қилади. Мен бироз йиғладим. У билан биринчи марта телефонда гаплашганимизда, унга тинчланишни айтдим. Аммо у ўз қарорини қабул қилди. Шундай бўлса-да, у Португалия учун жуда кўп иш қилди. У доимо мамлакат қаҳрамони бўлган, лекин муносиб даражада қадрланмаган”, дейди Долорес Авейру.

Аввалроқ, Роналду терма жамоа йиғинини муддатидан олдин тарк этган эди. Футболчининг айтишича, бунга Португалия терма жамоаси бош мураббийи Жорже Жезушнинг унга берган ваъдасини икки марта бузгани сабаб бўлган.

Роналду Миллатлар лигасининг янги мавсумида Уэльсга қарши ўйинда (1:0) майдонга тушган. Бироқ Норвегияга қарши баҳсда (2:1) захирада қолдирилган.

Футболчининг таъкидлашича, дастлаб унинг ушбу учрашувда майдонга тушиши режалаштирилмаган. Аммо мураббий ундан ўйиннинг 30 дақиқасида майдонга тушишга тайёр туришни сўраган ва исиниш учун юборган. Шунга қарамай, Роналду ўйин давомида захирада қолган. Унинг сўзларига кўра, мураббий бу ҳолатни учрашувдан кейинги матбуот анжуманида изоҳлаши керак эди, аммо бундай қилмаган.

Кейинроқ Роналду терма жамоадан кетиш нияти йўқлигини билдирган. Шунингдек, Португалия футбол федерацияси унга нисбатан интизомий чора қўллаганидан кейин ҳам терма жамоага чақирилиши мумкинлигини айтган.

Португалия футбол федерациясининг интизомий қоидаларига кўра, терма жамоани рухсатсиз тарк этиш бир ойдан олти ойгача ўйинлардан четлатиш ва 500 евродан 1 000 еврогача жаримага сабаб бўлиши мумкин. Роналду ўзига муносиб деб топилган жазони қабул қилишга тайёрлигини билдирган.

Маълумот учун, 41 ёшли Роналду беш карра Чемпионлар лигаси ғолиби, Европа чемпиони ва икки карра Миллатлар лигаси ғолибидир. У миллий терма жамоалар, Европа чемпионатлари, Чемпионлар лигаси ва клублар ўртасидаги жаҳон чемпионатидаги голлар сони бўйича бир қатор рекордларга эга.

Футболчи 2022 йил декабрь ойидан буён Саудия Арабистонининг “Ал-Наср” клубида тўп сурмоқда. У фаолияти давомида жами 979 та гол урган. Шундан 146 таси Португалия терма жамоаси, 833 таси эса клублар сафида киритилган.