Мен диктаторман – Трамп (видео)

Кеча, 21 январь куни АҚШ Президенти Дональд Трамп Швейцариянинг Давос шаҳрида ўтказилган тадбиркорлар билан учрашув чоғида ўзини диктатор деб тан олди. Президентнинг бу ҳақдаги сўзлари Оқ уй томонидан эълон қилинди.

Унинг сўзларига кўра, бугун дунёга диктаторлар керак бўлади. 

“Мен бунга ишонолмаяпман. Биз бу нутқ ҳақида яхши фикрлар олдик. Одатда улар “у даҳшатли диктатор” дейишади. Мен диктаторман. Аммо баъзан диктатор керак бўлади. Бу ҳолатда улар бундай демади. Ва йўқ, бу соғлом мантиқ. Ҳаммаси соғлом мантиққа асосланган”, деган Трамп. 

Трампнинг айтишича, у ўз нутқи ҳақида ижобий фикрлар олган ва буни “соғлом мантиқ” билан изоҳлаган.

Президентлик фаолиятининг биринчи кунида “сиз ўзингизни диктатор деб ҳисоблайсизми?”, деган саволга Трамп салбий жавоб берган эди. 

“Мени шундай аташларини тасаввур ҳам қила олмайман”, деган эди у.

АҚШнинг барча 50 штатидан бўлган 5025 нафар вояга етган шахс ўртасида онлайн тарзда ўтказилган сўров натижаларига кўра, америкаликларнинг ярмидан кўпи Трампни “хавфли диктатор” деб атаган. Шу билан бирга, респондентларнинг 54 фоизи Трампнинг президентликдаги фаолиятини маъқулламаслигини билдирган, 100 кунлик президентлик фаолияти якунлари бўйича унинг ишини қўллаб-қувватлаганлар улуши 43 фоизни ташкил этган, демократлар ва республикачилар эса Трамп фаолиятини мутлақо қарама-қарши баҳолаган. 

20 январь куни Трампнинг АҚШ Президенти лавозимига қайта киришганига бир йил тўлди. Республикачининг сўзларига кўра, шу вақт ичида у “саккизта урушни тўхтатган”. Бироқ, сайловолди ваъдасига кўра “ҳеч қандай янги уруш бошламаслик”ни билдирганига қарамай, АҚШ бир нечта ҳарбий амалиётлар ҳам ўтказган. 

Эслатиб ўтамиз, аввалроқ АҚШ Президенти Дональд Трамп келажакда Бирлашган Миллатлар Ташкилоти ўрнини яқинда тузилган “Тинчлик кенгаши” эгаллаши мумкинлигини истисно қилмаганди. Журналистларнинг саволларига жавоб берар экан, Оқ уй раҳбари ҳозирги БМТ тузилмаси унинг назарида самарасиз ишлаётганини таъкидлаган.