Мелания Трамп Оқ уйни Янги йилга тайёрлади (фоторепортаж)

АҚШнинг биринчи хоними Мелания Трамп Рождество безакларини тақдим этди. Шунингдек, у Оқ уй ҳовлисида Президент арчасини қабул қилиб олди. Бу ҳақда Оқ уй расмий саҳифасида маълум қилди.

Келтирилишича, бу йилги байрам мавзуси, “Уй – юрак бор жойда” деб номланган. Байрам декори, шунингдек, келаси йили Мустақиллик Декларацияси имзоланиши ва Қўшма Штатлар ташкил топганининг 250 йиллиги нишонланишига ҳам ишора қилади.

Мамлакатнинг турли ҳудудларидан келган ўнлаб кўнгиллилар Президент қароргоҳи залларини безашда иштирок этди. Оқ уйга ўрнатилган безаклар орасида 75 та гулчамбар, 51 та арча, 200 метрдан ортиқ гулчамбар, 7,5 километр лента, шунингдек, кўплаб олтин юлдузлар, капалаклар ва бошқа элементлар бор.

Мовий хонадаги асосий Рождество дарахти хизмат вазифасини бажаришда яқинларини йўқотган оилалар шарафига олтин юлдузлар билан безатилди. Анъанага кўра, расмий дарахт ҳар бир штат ва ҳудудни рамзий англатади. Бу йил унда ҳар бир штатнинг расмий қуши ва гулининг тасвирлари жой олган.

Шарқий хонадаги дарахтлар қизил, оқ ва кўк рангларда безатилиб, яқинлашиб келаётган “Америка 250” тадбирларини таъкидлаш учун олтин бургут каби миллий рамзлар билан бойитилган.

Яшил хонада АҚШнинг Биринчи Президенти Жорж Вашингтон ва амалдаги Президент Дональд Трампнинг йирик портретлари намойиш этилган. Ҳар икки портрет 6000 дан ортиқ Lego қисмларидан йиғилган.

Байрамнинг асосий декорларидан бири – Давлат ошхонасида жойлашган занжабилли нонли Оқ уй макети бўлиб, у 120 фунт занжабилли нон, 100 фунт муз, 9 фунт шоколад ва 5 фунт музли безаклардан ясалган.

Биринчи хоним журналистларга бу йил аввалгиларидан бошқача бўлишини айтди.

Оқ уйга келтирилган арчанинг бўйи 25 фут (7,6 метр) бўлиб, у Мичиган штатининг марказий қисмидаги Сидней шаҳрида жойлашган Korson’s Tree фермасида ўстирилган. 

Арчани анъанавий тарзда Оқ уйнинг Мовий хонасига ўрнатиш режалаштирилган. Мелания Трамп арчани Шимолий портик зинапоясида қабул қилгач, мутахассислар уни қароргоҳ ичига жойлаштиришга тайёргарликни бошлади. Оқ уй ҳудуди бошқарувчиси Дейл Ҳейни бу арчани сентябрь ойидаёқ танлаб қўйган эди.