Мексикада кўприкка осилган 4 та бошсиз жасад топилди

Жорий йилнинг 30 июнь куни Мексикада наркокартеллар ўртасидаги қонли тўқнашувлар туфайли 20 киши ўлдирилган. Уларнинг тўрттаси бошсиз ҳолда кўприкка осилган ҳолда топилган. Бу ҳақда “New York Post” нашри хабар берди.

Синалоа штати прокуратурасининг маълумотига кўра, уларнинг барчаси ўқдан ҳалок бўлган.

“Бешта жасад бошсиз эди, шулардан тўрттаси Синалоа штатининг энг йирик шаҳри Куляканнинг яқинидаги автомобиль йўлидаги кўприкка оёғидан осиб қўйилган. Яна 15 жасад, жумладан, бешинчи бошсиз жасад, кўприкдан унча узоқ бўлмаган фургон ичидан топилган. Расмийлар яқин атрофда одамларнинг каллалари солинган пластик халта ҳам аниқланганини айтишди”, дейилади хабарда.

Ўша ердаги фургон устига Синалоада бир-бирига душман наркокартеллар ўртасидаги урушларга ишора қилувчи баннер ёпиштирилган бўлган. Ҳалок бўлганлар орасида ёш йигит ва икки аёл ҳам бор.

Сўнгги пайтларда кучайган зўравонлик учун “Лос Чапитос” ва “Ла Майиза” деб аталувчи картеллар ўртасидаги курашлар сабаб сифатида кўрсатилмоқда. Хавфсизлик манбаларининг таъкидлашича, улар Синалоадаги стратегик гиёҳванд модда савдоси йўналишлари учун жанг қилмоқда.

Бу икки гуруҳ ўртасида қонли тўқнашувлар ўтган йили сентябрь ойида бошланган. Можарога “Эл Чапо” номи билан танилган машҳур гиёҳванд барони Хоакин Гузманнинг ўғли томонидан душман лидерлардан бирининг ўғирлаб кетилиши ва кейин АҚШга топширилиши сабаб бўлган.

Шундан бери илгари нисбатан тинч бўлган Кулякан шаҳри доимий зўравонлик майдонига айланган. Синалоа картели ҳудуддаги назоратни йўқотмоқда. Бироқ Мексика расмийлари вазият назорат остида эканини ва уюшган жиноятчиликка қарши чора кўрилаётганини айтмоқда.

“Ҳарбий ва полиция кучлари Синалоада тўлиқ тинчликни тиклаш учун биргаликда ишламоқда”, дейди маҳаллий ҳукумат вакили Фелисиано Кастро.

Эслатиб ўтамиз, ўтган йили Синалоа штатида наркокартель ва маҳаллий ҳуқуқ-тартибот идоралари ўртасидаги тўқнашувлар оқибатида 19 киши ҳалок бўлганди. Маҳаллий ҳуқуқ-тартибот идоралари операция давомида Мексиканинг Тинч океани жанубий қирғоғи картели фракциясига алоқадор бўлган ячейка раҳбари Эдвин Антониони ҳибсга олган. Операция давомида полицияга наркотик картелининг 30 дан ортиқ аъзоси ҳужум қилган.