Мексикада бирваракай 700 та автомобиль ёниб кетди (видео)

Мексиканинг Акапулько шаҳридаги жарима майдончасида юз берган йирик ёнғин оқибатида тахминан 700 та автомобиль бутунлай ёниб кетди. Машиналарнинг ёниб кулга айланаётгани ижтимоий тармоқлардаги видеоларда кенг тарқалди.

Видеоларда ўнлаб машиналардан фақат куйиб қолган каркаслар қолгани кўринади. Ёнғин вақтида осмонда жуда катта тутун уюми кўтарилган, шу сабабли яқин ҳудуддаги Акапулько – Пинотепа Насионал трассаси вақтинча ёпилган. Йўлда ҳаракат бир неча соатга тўхтатилган, чунки ҳайдовчилар учун кўриш имконияти кескин ёмонлашган.

Расмийларга кўра, ҳодиса жойига бир нечта қутқарув ва ёнғин ўчириш гуруҳлари юборилган. Ҳозирча жабрланганлар ҳақида маълумот йўқ.

Мутахассислар ёнғин кучли шамол ва қуруқ ўсимликлар сабаб тез тарқалганини, айрим жойларда яқин далаларга ҳам ўтганини билдирган. Ҳозирги пайтда ёнғиннинг қарийб 90 фоизи назоратга олинган, унинг келиб чиқиш сабаблари эса ҳозирча номаълум.

Эслатиб ўтамиз, аввалроқ Швейцариянинг ғарбий қисмидаги кичик шаҳарчада автобус ёнғинида камида 6 киши ҳалок бўлганди.