Мексикада ҳарбийларга ҳужум қилган 10 нафар қуролли ҳужумчи ўлдирилди

Мексиканинг Синалоа штатида дам олиш кунлари ўтказилган хавфсизлик амалиёти давомида сув тошқини хавфини кузатаётган денгиз кучлари ходимларига қилинган ҳужумдан сўнг 10 нафар қуролли ҳужумчи йўқ қилинди, яна 3 киши қўлга олинди. Бу ҳақда кеча, 6 июль куни Мексика денгиз флоти хабар қилди.

Баёнотга кўра, ҳарбийлар Эл Росарио муниципалитетида портловчи қурилма ёрдамида амалга оширилган дастлабки ҳужумга учраган. Кейинроқ хавфсизлик кучларига қарши иккинчи ҳужум уюштирилган, аммо жавоб зарбаси натижасида 10 нафар ҳужумчи ўлдирилган.

Қайд этилишича, дастлабки ҳужумда 3 нафар денгизчи жароҳатланган. Расмийлар маълумотига кўра, улардан бири вафот этган, қолган икки нафарининг ҳаётига хавф йўқ.

Ҳужум вақтида денгиз флоти ходимлари ёмғирлар мавсуми олдидан аҳолини ўз вақтида огоҳлантириш мақсадида дарёлар ва сув омборларида сув сатҳининг кескин кўтарилишини кузатаётган бўлган.

Билдирилишича, қўлга олинган 3 нафар гумонланувчига нисбатан жиноят ишини қўзғатиш учун улар прокуратурага топширилган. Амалиёт Синалоа штатида хавфсизлик чоралари сезиларли даражада кучайтирилган бир вақтда ўтказилган.

Эслатиб ўтамиз, жорий йилнинг 6 май куни Мали пойтахти Бамако шаҳридаги қишлоқларга уюштирилган террористик ҳужум оқибатида ўнлаб инсонлар халок бўлган эди.