Медведевнинг ўғли Европа Иттифоқининг қора рўйхатига киритилди

Россия Федерацияси Хавфсизлик кенгаши раиси ўринбосари Дмитрий Медведевнинг ўғли Илья Медведев Европа Иттифоқининг Россияга қарши санкцияларининг 12-пакетига киритилди. Ушбу рўйхат ЕИнинг расмий журналида эълон қилинди.

Ҳужжатда айтилишича, Медведев Донецк, Луганск, Херсон ва Запорожье ҳудудларида рақамли хизматлар кўрсатишни ташкил қилмоқда.

Европа Иттифоқига кўра, у "Мен русман" лойиҳасини мувофиқлаштиради. Унинг мақсади ушбу минтақалар аҳолисига Россия давлат хизматларини кўрсатиш, шу жумладан Россия фуқаролигини олишнинг соддалаштирилган тартибини таъминлаш экани иддао қилинган.

Шундай қилиб, матнда айтилганидек, у Украинанинг ҳудудий яхлитлиги, суверенитети ва мустақиллигига путур етказадиган ва таҳдид солувчи ҳаракатлар ва сиёсатни қўллаб-қувватлайди ва амалга оширади.

Жами 61 киши ва 86 компания ва ташкилот Европа Иттифоқининг санкциялар рўйхатига киритилган.

Маълумот учун, Иля Медведев 1995 йилда Санкт-Петербургда туғилган. У 2022 йил 21 июнда "Единая Россия" партиясига кирган.