Мбаппенинг жароҳати кутганидан жиддийроқ бўлиб чиқди

Испаниянинг “Реал Мадрид” клуби ва Франция терма жамоаси ҳужумчиси Килиан Мбаппенинг жароҳати клуб дастлаб кутганидан жиддийроқ бўлиши мумкин. Бу ҳақда Cadena SER нашри хабар берди.

Манбага кўра, Мадрид клуби француз ҳужумчисининг UEFA Чемпионлар лигаси 1/8 финал босқичида “Манчестер Cити”га қарши жавоб ўйинига қадар сафга қайтишига умид қилмоқда. Бироқ футболчига яқин манбалар вазиятга эҳтиёткорлик билан ёндашмоқда. 

Таъкидланишича, Мбаппенинг ушбу учрашувда майдонга тушиши маълум даражада хавф туғдириши мумкин. Ҳужумчи сўнгги пайтларда жамоа сафида бир неча бор жароҳат билан ўйнаганини ҳисобга олиб, навбатдаги йирик мусобақа олдидан жароҳатини янада оғирлаштиришни истамаяпти.

Манба маълумотига кўра, агар “Реал Мадрид” футболчининг тўлиқ тикланишига етарли вақт бермаса, бу унинг жисмоний ҳолатига салбий таъсир кўрсатиши мумкин. Шу сабабли Мбаппе ҳеч қандай таваккал қилишни истамаяпти ва тикланиш жараёнини шошилтирмаслик тарафдори.

Қайд этилишича, футболчи учун асосий мақсад – соғлиғини тўлиқ тиклаб, 2026 Жаҳон чемпионати олдидан оптимал жисмоний ҳолатда бўлишдир.