Мбаппенинг жароҳати ҳақида маълумот берилди

“Реал Мадрид” жамоаси ҳужумчиси Кйлиан Мбаппенинг чап тиззасидаги пай чўзилгани тасдиқланди. Бу ҳақда клуб матбуот хизмати хабар берди.

“Франциялик тиббиёт мутахассислари томонидан “Реал” тиббий хизмати назорати остида ўтказилган текширувдан сўнг футболчимиз Килиан Мбаппега чап тизза боғламларининг чўзилиши ташхиси қўйилди. Шунингдек, у ҳозирда консерватив даволаниш курсини ўтаётгани тасдиқланди. Унинг ҳолати мунтазам равишда назорат қилинади”, дейилади клубнинг расмий баёнотда.

Хабарларга кўра, Мбаппе яқинлашиб келаётган Жаҳон чемпионати сабаб жарроҳлик амалиётидан воз кечган ва айни пайтда клуб шифокорлари билан муқобил даволаш чораларини кўриб чиқмоқда.

Мбаппе Испания чемпионатининг доирасидаги “Сельта”га қарши сафар ўйинини ўтказиб юборади. Жамоа тўпурари Чемпионлар лигаси доирасидаги “Манчестер Cити”га қарши баҳсда сафга қайтиши мумкин.

Франциялик форвард 2025 йил декабридан буён тизза боғламлари билан боғлиқ муаммоларга дуч келмоқда. Шу сабабли Мбаппе Чемпионлар лигаси плей-офф босқичи доирасидаги “Бенфика”га қарши (2:1) жавоб учрашувини ҳам ўтказиб юборди.

Маълумот учун, Мбаппе 2024 йил ёзидан буён “Реал Мадрид” сафида тўп тепмоқда. Жорий мавсумда ҳужумчи клуб сафида 33 та учрашувда майдонга тушиб, 38 та гол урди ва 6 та голли узатмани амалга оширди.