Мбаппенинг онаси Мадриддан уй изламоқда
Спорт
−
29 Февраль
3113ПСЖ ҳужумчиси Килиан Мбаппенинг онаси ва агенти Фаиза Ламари ўғлини Мадридга олиб келиш устида ишламоқда. Бу ҳақда “Relevo” хабар берди.
Мадриднинг “Реал” клуби 25 ёшли ҳужумчи билан жорий мавсум якунида эркин агент сифатида шартнома имзолаш борасида келишиб олгани ҳақида хабарлар тарқалди.
Манбага кўра, Ламари сўнгги бир неча кунни Испания пойтахтида ўтказган ва Мбаппе учун уй-жой танлаш билан шуғулланган.
Қайд этилишича, форварднинг онаси ўғлининг “қаймоқранглилар” сафига ўтиши тафсилотларини муҳокама қилиш учун “Реал” вакиллари билан ҳам учрашган.
Маълумот учун, Мбаппе 2017 йилдан бери ПСЖда ўйнаб келмоқда. 25 ёшли футболчи парижликлар билан 13 та соврин ютган. Жорий мавсумда форвард барча турнирларда 31 та ўйин ўтказиб, 32 та гол урди ва 7 та голли узатмани амалга оширди. Футболчининг француз клуби билан шартномаси шу йилнинг июнь ойи охиригача амал қилади. “Transfermarkt” интернет порталига кўра футболчининг тахминий нархи 180 миллион еврони ташкил қилади.