Мбаппе ПСЖни судда ютиб чиқди

Кеча, 16 декабрь куни Париж меҳнат суди “Пари Сен-Жермен” клуби билан жамоанинг собиқ ҳужумчиси Килиан Мбаппе ўртасидаги 60 миллион евро миқдоридаги тўланмаган маош ва бонуслар бўйича низода Мбаппе фойдасига қарор чиқарди ҳамда клубни ушбу маблағларни тўлашга мажбур қилди. Бу ҳақда “France24” нашри хабар берди.

Мбаппе 2024 йилнинг апрель, май ва июнь ойларида маоши ҳамда бонуслари ушлаб қолингани сабаб ПСЖни судга берган эди. У клубни тарк этиб, “Реал Мадрид”га эркин агент сифатида ўтишидан бироз олдин ушбу тўловлар амалга оширилмаганини таъкидлаган.

“Биз қарордан мамнунмиз. Маош тўланмаганда бундай оқибат бўлиши табиий”,  деди Мбаппенинг адвокати Фредерик Кассереау.

Суд ПСЖ Мбаппенинг уч ойлик маоши, ахлоқий бонуси ҳамда меҳнат шартномасида кўзда тутилган имзо бонусини тўламаганини аниқлади. Мазкур суммалар Франция профессионал футбол лигаси (LFP) томонидан 2024 йил сентябрь ва октябрь ойларида қабул қилинган икки қарор асосида тўланиши лозим деб топилди.

Бироқ Мбаппенинг айрим қўшимча даъволари, жумладан, яширин меҳнат, ахлоқий босим ва иш берувчининг хавфсизлик мажбуриятларини бузиш ҳақидаги айбловлар ҳам суд томонидан рад этилди. Шунингдек, суд Мбаппенинг муддатли шартномасини доимий шартнома сифатида тан олмади, бу эса ишдан бўшатиш ва огоҳлантириш тўловлари билан боғлиқ эҳтимолий компенсация миқдорини чеклади.