Майк Тайсон Флойд Мейвезер билан жанг қилади

Супер оғир вазн тоифасидаги собиқ, мутлақ жаҳон чемпиони Майк Тайсон беш вазн тоифасидаги собиқ чемпион Флойд Мейвезерга қарши жанг ўтказади. Бу ҳақда Тайсон кеча, 5 сентябрь куни ўзининг X ижтимоий тармоғидаги саҳифасида маълум қилди.

59 ёшли Тайсон жанг афишасини эълон қилиб, “тез орада” деб изоҳ қолдирган.

Хабарларга кўра, жангни CSI (Sports/Fight Sports) ташкиллаштиради ва у 2026 йилнинг баҳорига режалаштирилган. Ҳозирча бошқа тафсилотлар маълум эмас.

Маълумот учун, Тайсон профессионал фаолиятини 2005 йилда якунлаган. Унинг ҳисобида 59 та жанг бор: улардан 7 тасида мағлубият, 44 тасида нокаут билан ғалаба қозонган. 2024 йил ноябрида Тайсон 27 ёшли блогер Жейк Полга қарши жанг ўтказиб, ҳакамлар қарори билан ютқазган эди.

48 ёшли Мейвезер эса профессионал фаолиятини 2017 йилда ММА жангчиси, ирландиялик Конор Макгрегор билан бўлган жангдан сўнг тугатган. Америкалик боксчи рингда жами 50 та жанг ўтказиб, уларнинг барчасида ғалаба қозонган. Фаолиятини якунлаганидан кейин ҳам у мунтазам равишда кўргазмали жангларда қатнашиб келмоқда.