Мауро Икардига қарши жиноий иш қўзғатилди

“Галатасарой” клубининг собиқ ҳужумчиси, ҳозирда эркин агент мақомида бўлган Мауро Икардига нисбатан жиноий иш очилди. Бу ҳақда “Noticias Argentinas” нашри хабар берди.

Маълумотларга кўра, бунга футболчининг 11 ёшли қизи ва собиқ рафиқаси Ванда Нара билан боғлиқ воқеа сабаб бўлган.

Ванда Нара полицияга берган кўрсатмасида Икарди қизини койигани ва хонага қамаб қўйганини айтган. Унинг сўзларига кўра, қиз онасига WhatsApp орқали хабар юбориб, отаси уни ургани ва қўрқаётганини билдирган.

Кейинроқ қиз уйдан мустақил равишда чиқиб кетишга муваффақ бўлган ва онасининг қарамоғига ўтган. Уларнинг 10 ёшли иккинчи қизи ҳам Ванда Нара билан бирга кетган.

Воқеа жойига полиция ва тез ёрдам ходимлари чақирилган. Икарди эса уйда қолган ва ҳуқуқни муҳофаза қилувчи органлар ходимлари билан суҳбатлашишдан бош тортган.

Тигре шаҳри гендер зўравонлигига қарши кураш бўлими прокурори Хулио Петруччи Ванда Нарадан кўрсатма олишни ҳамда қиз ва футболчини суд-тиббий экспертизасидан ўтказишни буюрган. 

Шунингдек, Икардидан кеча, 12 ноябрь куни адвокатлари ҳамроҳлигида прокурорликда кўрсатма олинган.

Таъкидлаш жоизки, ҳозирда мазкур ҳолат юзасидан тергов ҳаракатлари давом этмоқда. Икардининг адвокатлари футболчига қўйилган айбловларни рад этиб, у қизига нисбатан зўравонлик ишлатмаганини билдирган.