Маск OpenAI раҳбарини лавозимидан четлатмоқчи

Миллиардер Илон Маск OpenAI бош ижрочи директори Сэм Альтман ва компания президенти Грег Брокманни ишдан бўшатишга ҳаракат қилмоқда. Бу ҳақда CNBC хабар берди.

Маълум қилинишича, Маск 2024 йилда OpenAI (ChatGPT ишлаб чиқувчиси) раҳбариятини компаниянинг дастлабки нотижорат мақсадларидан воз кечганликда айблаб, даъво аризаси билан судга мурожаат қилган.

Нашрнинг ёзишича, Маск ушбу ваъдаларга ишониб, компанияга 38 миллион доллар хайрия қилган. Кеча, 7 апрель куни тақдим этилган навбатдаги суд ҳужжатида Маскнинг юристлари агар суд алдовни тан олса, уларнинг мижози талаб қиладиган аниқ чораларни баён қилган.

“Даъвогар Альтманни OpenAI нотижорат кенгашидаги директорлик лавозимидан ҳамда Альтман ва Брокманнинг иккаласини OpenAI тижорат бўлинмасидаги лавозимларидан четлатиш тўғрисида қарор чиқарилишига ҳаракат қилади”, дейди юристлар.

Уларнинг сўзларига кўра, агар хайрия ташкилоти раҳбарлари ва директорлари ташкилотнинг ижтимоий миссиясини ҳимоя қилмаса ёки бажармаса, уларни лавозимидан четлатиш одатий чора ҳисобланади.

Шунингдек, Маск суддан OpenAI компаниясини тўлақонли нотижорат ташкилот сифатида ишлашга қайтариш мажбуриятини юклашни сўрамоқда. Маълум қилинишича, қайта ташкил этилгандан сўнг OpenAI нотижорат тузилма сифатида бошқарилмоқда ва унинг ChatGPT кирадиган тижорат бўлинмасида 26 фоизлик улуши бор. Ушбу иш бўйича судьялар ҳайъатини танлаш жорий йилнинг 27 апрель куни бошланиши керак.

Эслатиб ўтамиз, аввалроқ Илон Маскнинг сунъий интеллект стартапи xAI АҚШнинг Техас штат федерал судида Apple (AAPL.O) ва ChatGPT яратувчиси OpenAI’ни сунъий интеллект соҳасидаги рақобатни йўқотиш учун ноқонуний тил бириктиришда айблаб, судга берганди.