Марокашда Қурбон ҳайитида қурбонлик қилиш тақиқланди

Марокаш Қироли Муҳаммад VI фуқаролардан жорий йилда Қурбон ҳайити пайтида қурбонлик маросимини вақтинча тўхтатишни талаб қилди. Бу ҳақда “Yeni Safak” хабар берди.

Қайд этилишича, ушбу қарорга мамлакатда давом этаётган кучли қурғоқчилик ҳамда унинг чорвачилик ва иқтисодиётга таъсири сабаб бўлган. Қарорни мамлакатнинг Диний ишлар вазири Аҳмад Тавфиқ давлат телеканалида ўқиб эшиттирган.

“Биз ушбу диний амалиётни энг яхши тарзда амалга оширишга интилдик. Бироқ мамлакат дуч келаётган иқлимий ва иқтисодий муаммоларни, айниқса чорва сонининг кескин камайишини инобатга олиш лозим”, деган вазир ўз сўзида.

У, шунингдек, қурбонлик қилишни мажбурий деб билмаслик ва бу кўплаб кам таъминланган оилаларга катта зарар бўлиши мумкинлигини таъкидлаган.

“Қурбонлик – тасдиқланган суннат бўлиб, яъни бажарилиши афзал, аммо мажбурий эмас. Мавжуд оғир шароитларда ушбу амалиётни бажариш, айниқса кам таъминланган қатламлар учун жиддий зарар етказиши мумкин”, дея қўшимча қилган Тавфиқ.

Маълумот учун, Марокашда бу ҳолат илк бор юз бермаяпти. Аввалроқ, қирол Ҳасан II ҳам 1963, 1981 ва 1996 йилларда худди шундай қарорларни қабул қилган, бунга ўша пайтлардаги қурғоқчилик ва иқтисодий инқирозлар сабаб бўлган.

Айни вақтда Марокаш кетма-кет етти йил қурғоқчиликни бошдан кечирмоқда, бу эса чорва сони ва гўшт нархларига салбий таъсир кўрсатмоқда. Ўтган йили ҳукумат томонидан 300 минг бош чорва ҳайвонлари импорт қилинган ва ҳар бир бош учун 500 дирҳам (тахминан 50 доллар) субсидия ажратилган бўлишига қарамай, бир бош қурбонлик молининг нархи 200 дан 700 долларгача бўлган.

Эслатиб ўтамиз, аввалроқ Ўзбекистонда 6 июнь жума куни Қурбон ҳайити нишонланиши ҳақида хабар берилганди. Сўнгра Ўзбекистон мусулмонлари идораси ҳайит намози вақтларини эълон қилди.