“Марихуана”лар занжири фош этилди

Давлат божхона қўмитаси Контрабанда ва божхона қонунчилиги бузилишига қарши курашиш бошқармаси ҳуқуқни муҳофаза қилувчи бошқа идора вакиллари билан ҳамкорликда гиёҳванд моддаларининг ноқонуний айланмасига қарши тезкор тадбир ўтказди. 

Тадбир давомида, “Қашқадарё–Тошкент” йўналиши бўйлаб ҳаракатланиб келаётган фуқаро А.У. бошқарувидаги “Нексия 2” русумли автомашина тўхтатилиб, холислар иштирокида текширилди. Натижада, автомашинада фуқаро М.Б. томонидан 2 дона гугурт қутисида олиб кетилаётган оғирлиги 4,96 грамм бўлган “марихуана” гиёҳвандлик воситаси борлиги аниқланди. 

Шунингдек, фуқаро М.Б.нинг кўрсатмасига биноан Қашқадарё вилоятида фуқаро Ж.Ш.нинг яшаш хонадони холислар иштирокида кўздан кечирилди. Натижада, ўтинхона шифтидаги карнай ичида ва кўрпа-тўшаклар орасидаги тамаки қутиси ичига гугурт қутиларида яширилган, оғирлиги жами 2,4 грамм бўлган “марихуана” гиёҳвандлик моддаси борлиги аниқланди. 

Экспертиза хулосасига кўра, ашёвий далил сифатида юқоридаги ҳолатлар юзасидан олинган гиёҳвандлик воситалари “марихуана” гиёҳвандлик моддаси эканлиги расман тасдиқланди. 

Ҳозирда мазкур ҳолатлар юзасидан текширув ҳаракатлари олиб борилмоқда.