Марҳум мухолифатчининг беваси Путинга қарши иш бошлади

2024 йилнинг февраль ойида Россиядаги қамоқхонада вафот этган россиялик мухолифатчи Алексей Навальнийнинг беваси Юлия Навальная Россия Президенти Владимир Путиннинг “Ягона Россия” партиясига қарши сайловолди кампаниясини эълон қилди. Бу ҳақда Навальная бугун, 24 сентябрь куни ўзининг Telegram саҳифасида ёзди.

Унинг сўзларига кўра, ушбу сайловолди кампанияси 2026 йилнинг сентябрида бўлиб ўтадиган Давлат Думасига сайловлар учун режалаштирилган.

“Бизда бир йил бор. Биз етиб борадиган ҳар бир сайловчи билан гаплашиб, Путиннинг партияси уларни қандай алдаётганини айтиб беришимиз керак”, дейди Навальная.

Навальнийнинг беваси ҳатто 2021 йилнинг сентябрида “Ягона Россия”га овоз берганлар ҳам уруш, қашшоқлик, арзон ипотека кредитлари, соғлиқни сақлаш ва уй-жой ҳамда коммунал хизматларнинг вайронагарчиликлари учун овоз бермагани, чунки барча пуллар урушга кетганини айтган.

Шу мақсадда у сайлов олдидан йил давомида сайловчилар билан “Ягона Россия”нинг ваъдалари ва партия аслида нимага эришгани ҳақида суҳбатлашишни таклиф қилди.

“Биз Россия тинч, фаровон ва бахтли бўлиши мумкинлигини айтамиз ва кўрсатамиз. Яхшиямки, бизда жуда кўп ғоялар бор ва бизда бу бўйича дастур бўлади”, деди у.

Навальнаянинг айтишича, яқинда Россия жамоатчилик фикрини ўрганиш маркази томонидан ўтказилган сўровномага кўра, ҳукмрон партиянинг маъқуллаш рейтинги 33 фоизни ташкил этади.

“2026 йилги сайловларда ҳақиқий рақобат бўлмаслигини тушуниш учун сиёсий эксперт бўлиш шарт эмас. Мустақил номзодларга ҳатто сайлов қутисига ўқ ҳам ташлашга рухсат берилмайди. Аммо биз Путиннинг партиясини барибир барбод қилишимиз мумкин”, дея эълон қилди Навальная.

Маълумот учун, 2021 йилги Давлат Думаси сайловларидан сўнг “Ягона Россия” 49,82 фоиз овоз олиб, амалдаги парламентда 315 ўринни эгаллади. Россия Федерацияси Коммунистик партияси 18,93 фоиз билан 57 ўрин, 7,55 фоиз билан Россия Либерал-демократик партияси 22 ўрин, “Адолатли Россия – Ҳақиқат учун” 7,46 фоиз билан 28 ўрин, “Янги халқ” партияси 5,32 фоиз билан 15 ўринни қўлга киритди.

Эслатиб ўтамиз, Юлия Навальная жорий йилнинг 23 август куни Берлинда Германиянинг собиқ канцлери Олаф Шольц ва собиқ ташқи ишлар вазири Анналена Бербок билан учрашганди. Навальная Шольц билан Россиядаги сиёсий маҳбусларга ёрдам беришни муҳокама қилганди.