Marhum muxolifatchining bevasi Putinga qarshi ish boshladi

2024 yilning fevral oyida Rossiyadagi qamoqxonada vafot etgan rossiyalik muxolifatchi Aleksey Navalniyning bevasi Yuliya Navalnaya Rossiya Prezidenti Vladimir Putinning “Yagona Rossiya” partiyasiga qarshi saylovoldi kampaniyasini e’lon qildi. Bu haqda Navalnaya bugun, 24 sentyabr kuni o‘zining Telegram sahifasida yozdi.

Uning so‘zlariga ko‘ra, ushbu saylovoldi kampaniyasi 2026 yilning sentyabrida bo‘lib o‘tadigan Davlat Dumasiga saylovlar uchun rejalashtirilgan.

“Bizda bir yil bor. Biz yetib boradigan har bir saylovchi bilan gaplashib, Putinning partiyasi ularni qanday aldayotganini aytib berishimiz kerak”, deydi Navalnaya.

Navalniyning bevasi hatto 2021 yilning sentyabrida “Yagona Rossiya”ga ovoz berganlar ham urush, qashshoqlik, arzon ipoteka kreditlari, sog‘liqni saqlash va uy-joy hamda kommunal xizmatlarning vayronagarchiliklari uchun ovoz bermagani, chunki barcha pullar urushga ketganini aytgan.

Shu maqsadda u saylov oldidan yil davomida saylovchilar bilan “Yagona Rossiya”ning va’dalari va partiya aslida nimaga erishgani haqida suhbatlashishni taklif qildi.

“Biz Rossiya tinch, farovon va baxtli bo‘lishi mumkinligini aytamiz va ko‘rsatamiz. Yaxshiyamki, bizda juda ko‘p g‘oyalar bor va bizda bu bo‘yicha dastur bo‘ladi”, dedi u.

Navalnayaning aytishicha, yaqinda Rossiya jamoatchilik fikrini o‘rganish markazi tomonidan o‘tkazilgan so‘rovnomaga ko‘ra, hukmron partiyaning ma’qullash reytingi 33 foizni tashkil etadi.

“2026 yilgi saylovlarda haqiqiy raqobat bo‘lmasligini tushunish uchun siyosiy ekspert bo‘lish shart emas. Mustaqil nomzodlarga hatto saylov qutisiga o‘q ham tashlashga ruxsat berilmaydi. Ammo biz Putinning partiyasini baribir barbod qilishimiz mumkin”, deya e’lon qildi Navalnaya.

Ma’lumot uchun, 2021 yilgi Davlat Dumasi saylovlaridan so‘ng “Yagona Rossiya” 49,82 foiz ovoz olib, amaldagi parlamentda 315 o‘rinni egalladi. Rossiya Federatsiyasi Kommunistik partiyasi 18,93 foiz bilan 57 o‘rin, 7,55 foiz bilan Rossiya Liberal-demokratik partiyasi 22 o‘rin, “Adolatli Rossiya – Haqiqat uchun” 7,46 foiz bilan 28 o‘rin, “Yangi xalq” partiyasi 5,32 foiz bilan 15 o‘rinni qo‘lga kiritdi.

Eslatib o‘tamiz, Yuliya Navalnaya joriy yilning 23 avgust kuni Berlinda Germaniyaning sobiq kansleri Olaf Shols va sobiq tashqi ishlar vaziri Annalena Berbok bilan uchrashgandi. Navalnaya Shols bilan Rossiyadagi siyosiy mahbuslarga yordam berishni muhokama qilgandi.