Малика Диананинг “қасос кўйлаги” аукционга қўйилади

Буюк Британиянинг марҳум маликаси Диана 1994 йилда шаҳзода Чарльзнинг хиёнати ошкор бўлган куни кийган машҳур қора кўйлак 220 минг фунт стерлинггача бўлган нархда аукционга қўйилади. “Қасос кўйлаги” номи билан танилган ушбу либос декабрь ойида Sotheby’s аукцион уйида сотилади. Бу ҳақда “The Guardian” хабар берди.

Қайд этилишича, 1994 йилда Кристина Стамболян томонидан тикилган кўйлак мода тарихида алоҳида йўналиш пайдо бўлишига сабаб бўлган. Унинг нархи 220 минг фунт стерлинггача баҳоланмоқда. 1994 йил сентябрь ойининг бир оқшомида Уэльс маликаси Диана кийган кўйлак фақат дизайни билангина эсда қоларли эмас эди. Қора рангли, баданига ёпишиб турадиган, елкаси очиқ ва калта либос мода тарихида кейинчалик “қасосона кийиниш” деб аталган бутун бир йўналишнинг пайдо бўлишига сабаб бўлган.

Диана бу кўйлакни Чарльз ўзининг хиёнатини телевизион интервьюда ошкор қилган куни кечқурун кийган. Оммавий ахборот воситалари тез орада уни “қасос кўйлаги” деб атай бошлаган. Ҳатто унинг номи билан аталган алоҳида Википедия саҳифаси ҳам мавжуд.

Эндиликда кўйлак 1997 йилдан бери илк бор аукционга қўйилмоқда. Декабрь ойида Sotheby’s аукцион уйи Кристина Стамболян томонидан яратилган либосни сотувга чиқаради. Унинг тахминий нархи 110 мингдан 220 минг фунт стерлинггача баҳоланмоқда. Шу ой кўйлак Лондон, кейинчалик Гонконг, Женева ва Нью-Йоркда намойиш этилади. Савдо айнан Нью-Йоркда ўтказилади.

Sotheby’s компаниясининг сумкалар ва мода йўналиши бўйича глобал раҳбари Морган Халими ушбу либос мода тарихидаги жуда кам учрайдиган ҳодисалардан бири эканини айтган.

“У мода тарихида ўзига хос ўрин эгаллайди, чунки кийим-кечак мода доирасидан чиқиб, маданият тарихининг бир қисмига айланган жуда нодир лаҳзалардан бирини ифодалайди”, деган Халими.

Кўйлакнинг машҳурлиги 1990 йиллардагина бошланган. Диана 1997 йилда ушбу либосни хайрия аукционида ўзи сотганида, ундан 39 098 фунт стерлинг тушган. Ўша пайтда кўйлакни сотиб олган оила уни шу кунгача сақлаб келган.

Кўйлак жамоатчилик Дианани кўришга одатланган анъанавий образдан кескин фарқ қилган. Аслида у ўша оқшом учун Valentino брендининг анъанавий кўйлагини кийишни режалаштирган бўлган, бироқ охир-оқибат Stambolian либосини танлаган. Дизайнер кейинчалик Диананинг бу танловини “Оққуш кўли” балетидаги қора оққуш Одил образи билан таққослаган.

“У оқ либосдаги бегуноҳ Одетта каби саҳнада ўйнашни танламади. У очиқчасига ғазабланган эди. У қора либосдаги Одил каби кўринди. У ёрқин қизил тирноқ бўёғини суртди, бундай ҳолатни биз илгари ҳеч қачон кўрмагандик. У гўё: “Бугун кечқурун ёвузроқ бўлайлик”, дегандек эди”, деган дизайнер 2022 йилда “Harper’s Bazaar” нашрига берган интервьюсида.

Диана вафот этганига қарийб 30 йил бўлганига қарамай, у ёш авлод учун ҳам мода тимсоли бўлиб қолмоқда.

“Энг муҳими, одамлар шунчаки унинг кийган кийимларидан илҳомланмайди. Улар Диананинг мода танловлари нимани англатганидан илҳомланади”, дея қўшимча қилган у.

Эслатиб ўтамиз, аввалроқ Буюк Британиянинг марҳум маликаси Диана Спенсернинг укаси Чарльз Спенсер опасининг ҳаёти, шаҳзода Чарльз билан никоҳи ва Париждаги ҳалокатидан кейинги воқеалар ҳақида китоб ёзган эди.