“Мактаби бомбаланган Эрондан келдим”. Пезешкиён БМТ минбарида нутқ сўзлади (видео)

Бугун, 23 сентябрь куни Эрон Президенти Масъуд Пезешкиён Нью-Йоркда БМТ Бош Ассамблеяси мажлисида иштирок этди. Бу АҚШ билан уруш ҳолатида бўлган мамлакат етакчисининг ушбу ташкилот олдида чиқиш қилиши билан боғлиқ биринчи ҳолат.

“Америка ва Исроил энг сўнгги технологиялар ва қурол-яроғ тизимларидан фойдаланган ҳолда бизга ҳужум қилди, халқимиз эса матонат билан дош берди. Ҳа, улар бизга зарба беришди, аммо биз тиз чўкмадик ва бош эгмадик”, дейди Пезешкиён. 

Эрон Президенти ўз нутқи давомида таслим бўлмасликка ваъда берган ҳамда Америка етакчиси Дональд Трамп унинг мамлакатини тушунмаслигини айтиб, низога чек қўйиш воситаси сифатида дипломатияга ишонишини урғулаган.

“Жаноб Трамп ва бизни қўрқитишга уринаётганлар Эронни тушунишлари керак, биз мулоқот, дипломатия ва музокараларга тайёрмиз, лекин куч тилида гаплашишни қабул қилишга тайёр эмасмиз”, дейди у.

Шунингдек, Пезешкиён Эроннинг ўзи терроризм қурбони бўлганини айтган. У мамлакат олий раҳбарининг ўлдирилиши, болалар ўйнаётган мактаб ва спорт залига берилган зарбалар, шунингдек, Теҳронда Исмоил Хониянинг ўлдирилганини эслаб ўтган. Президент АҚШ ва Исроилни университетлар, шифохоналар ва бошқа фуқаролик объектларига зарба беришда айблаган.

“Куни кеча Трамп бизни террорчилар деб атади. Аслида эса биз терроризм қурбони бўлиб келмоқдамиз. Мен муҳтарам Олий раҳбаримиз ҳеч қандай ҳуқуқий меъёрсиз ва сабабсиз суиқасдга учраган Эрондан келдим. Мен мактаби бомбаланган Эрондан келдим. Ушбу болаларни кўряпсизми? Бу болалар АҚШ ва Исроил томонидан қўлланган қуроллар ва бомбалар остида ҳалок бўлди. Улар айбсиз эди ва ҳеч қандай жиноят содир этишмаган эди”, дейди Эрон Президенти.

Пезешкиён Эрон шаҳарларини бомбардимон қилиш жавобсиз қолади, деган иллюзия ҳеч кимда пайдо бўлмаслиги учун Эрон мудофаа тизимини яратганини маълум қилган. Эроннинг мудофаа қудрати ҳимояланиш учун мўлжалланган ва Теҳронга ўзини ҳимоя қилиш учун кимнингдир рухсати керак эмас.

Шу билан бирга, у Эрон ядровий билимлар бир нечта мамлакатларнинг монополияси бўлиб қолишига кўнмаслигини айтган.

“Эрон ядровий қуролни хавфсизлик омили деб ҳисобламайди, аммо фан, саноат ва тинчликпарвар энергетикага бўлган ўз ҳуқуқидан ҳам воз кечмайди. Очиғини айтайлик: ядровий қуролга – йўқ, ядровий билимларга бўлган ҳуқуқдан маҳрум қилишга – йўқ”, дейди у.

Пезешкиённинг фикрича, Эроннинг ядровий масаласини “жанг майдонида ҳал қилиб бўлмайди”. Дунёга Эрон дастурининг истисносиз тинчлик хусусиятига эга экани бўйича ишончли кафолатлар, Эрон халқига эса ўз ҳуқуқларига риоя этилишига ишонч берадиган келишув ягона ечимдир. У “икки хил стандартлар”ни танқид қилган.

“Атом ва ядровий бомбалар Исроил режимининг қўлида, лекин инспекторлардан Эронга келиш талаб қилинмоқда. Исроил Ғазода 70 мингдан ортиқ айбсиз инсонларни ваҳшийларча ўлдирди, аммо Эрон музокаралар столи ортида ўтирган бир вақтда бомбаланди.

Исроил ядровий бомбага, оммавий қирғин қуролларига эга, Ядро қуролини тарқатмаслик тўғрисидаги шартномага аъзо эмас ва ўзининг шармандали мавжудлиги давомида бирор маротаба ҳам текширувга рухсат бермаган, бироқ минтақадаги исталган пойтахтни хоҳлаганича бомбалаши учун уларга барча зарур имкониятлар яратиб берилмоқда”, дейди у.

Ҳормуз бўғизи ҳақида гапирар экан, Пезешкиён бошқа мамлакатлар ушбу сув йўлидан фойдаланиб, бир вақтнинг ўзида ундан Эронга ҳужум қилиш ва Эроннинг ўзи учун ушбу йўлни ёпиш мақсадида фойдаланаётганини маълум қилган. Унинг сўзларига кўра, урушнинг кенгайиши хавфсизлик олиб келмайди, минтақа муаммоларини эса айнан шу минтақа давлатларининг ўзи ҳал қилиши керак.