Мактаб таълимини ривожлантирмасак, ёшларимиз шароит бор жойга кетади – Мирзиёев

Ўзбекистон мактабларида таълим яхшиланмаса, ёшлар шароити бор давлатларга кетиб қолади. Бу ҳақда Президент Шавкат Мирзиёев мактаблардаги таълимга бағишланган видеоселектор йиғилишида айтиб ўтди.

“Нажот таълимда, нажот тарбияда, нажот билимда. Мактаб таълимини ривожлантирсак, олий таълим ҳам, илмимиз ҳам келажакда ривожланади.

Ҳозир шу масалани қилмасак, нафақат кечирмайди, ёшларимиз шароит бор жойга кетади.

Биз кўп вақт йўқотдик, десак тўғри бўлади. Эътибор бермадик”, деган Шавкат Мирзиёев йиғилишда.

Президент мактаблардаги таълим фақатгина Халқ таълими вазирлигининг иши эмаслигини, агар бу жабҳа ўнгланмаса, натижаларга етиш имконсизлигини урғулаган.

“Агар кимда-ким мактаб бу фақат Халқ таълими вазирлигининг иши, деб ўйласа, бу жуда хато фикр ва хато ёндашув.

Бутун элимиз билан, бутун жамиятимиз билан Халқ таълими вазирлигига эътибор бермасак, қўйган ҳамма натижаларимиз бўлмайди. 

Бир кун эмас, бир соат ҳам кечиксак, бу иқтисодиётимизга, эртанги кунимизга, ёшларимизга катта зиён бўлади”, деган Президент Мирзиёев.