“Макрондан кейин ким?”. Францияда президентлик пойгаси қизғин кетмоқда

Франциянинг собиқ бош вазири Габриэль Атталь 2027 йилги президентлик сайловларида иштирок этишини расман эълон қилди. Бу қарор марказчи сиёсатчилар ўртасидаги рақобатни янада кучайтириши ва овозларнинг бўлиниб кетиш хавфини ошириши мумкин. Бу ҳақда “Reuters” хабар берди.

37 ёшли Атталь Эммануэль Макрон давридаги энг таниқли сиёсатчилардан бири ҳисобланади. Бироқ таҳлилчиларга кўра, унинг Макронга жуда ўхшаш сиёсий қиёфаси сайловчилар қўлловини чеклаши мумкин.

Атталь марказчи лагерьдаги асосий рақиби – собиқ бош вазир Эдуард Филипп билан кескин кураш олиб боради. Сўровларга кўра, биринчи турда Атталь 14 фоизгача, Филипп эса 25 фоизгача овоз тўплаши мумкин.

Нашрнинг ёзишича, Францияда марказчи кучларнинг бўлиниб кетиши ўта ўнг ва ўта чап сиёсатчилар фойдасига ишлаши мумкин. Сиёсий доираларда иккинчи турга Жордан Барделла ёки Марине Ле Пен бошчилигидаги ўта ўнг кучлар ҳамда сўлчи етакчи Жан-Люк Меланшон чиқиши мумкинлиги хавотир уйғотмоқда.

Габриэль Атталь Францияни “Европанинг етакчи давлати”га айлантиришга ваъда берган.

“Франция сиёсати доимий таназзулни бошқариш билан чекланиб қолганидан чарчадим. Мен Францияни ва французларни чин дилдан севганим учун президентликка номзодимни қўяман”, деган у.

Габриэль Атталь коронавирус пандемияси даврида ҳукумат матбуот котиби сифатида машҳурликка эришган, кейин эса, Франция тарихидаги энг ёш бош вазирга айланган эди. Унинг бош вазирлик фаолияти атиги етти ой давом этди ва Макрон муддатидан олдин парламент сайловини эълон қилгач якунланди.

Ҳозирда Атталь Макроннинг партиясига раҳбарлик қилмоқда.

Нашрнинг таъкидлашича, Атталь рақиби Филиппдан фарқли равишда сайловолди кампаниясида шахсий ҳаёти ҳақида очиқ гапирмоқда. У болалигида босимга учрагани, отасининг вафоти ҳақида ҳам сўз юритган.

Таълим вазири бўлганида у дунёвийлик тамойили асосида мактабларда абайя кийимини тақиқлаш қарори билан катта шов-шувга сабаб бўлган эди.

Эслатиб ўтамиз, аввалроқ сўл қанот етакчиси Жан-Люк Меланшон Францияда келаси йил бўлиб ўтадиган президентлик сайловида иштирок этишини айтганди.