Макрон кўришиш учун қўл узатган Модига жавоб қайтармади (видео)

Бугун, 11 февраль куни Франция Президенти Эммануэль Макрон Парижда ўтаётган AI Action халқаро сунъий интеллект саммитида кўришиш учун қўл узатган Ҳиндистон Бош вазири Нарендра Модига жавоб қайтармади. Саммит трансляцияси “Associated Press”нинг YouTube каналида эълон қилинди.

Меҳмонларни кутиб олган Эммануэль Макрон АҚШ вице-президенти Жеймс Дэвид Вэнс, БМТ Бош котиби Антониу Гутерриш, Канада Бош вазири Жастин Трюдо ва Еврокомиссия раҳбари Урсула фон дер Ляйенни қарши олган. Бироқ Ҳиндистон Бош вазири Нарендра Модининг узатилган қўлини эътиборсиз қолдирган.

Бироқ Макроннинг Модига қўл узатмагани аслида олдиндан ўзаро саломлашиб бўлгани билан боғлиқ бўлиши мумкин. Хабарларга кўра, улар саммитга бирга келган, шунингдек, олдинроқ эълон қилинган фотосуратларда Макрон Моди билан қўл бериб кўришгани ва уни қучоқлагани акс этган. Бундан ташқари, икки етакчи саммит иштирокчилари билан биргаликда суратга тушган. Шу сабабли, Макроннинг саммит давомида Модига қўл бермаслиги совуқ муносабатлар туфайли эмас, балки олдиндан саломлашиб бўлиши билан боғлиқ оддий ҳолат бўлиши мумкин.

Конференцияда Нарендра Моди сунъий интеллектдан фойдаланишни ўрганиш учун инвестицияларни кўпайтиришга чақирган. AI Action 2025 саммитини ташкил қилган Франция томони кейинги йили тадбир Ҳиндистонда ўтказилишини маълум қилган.

Эслатиб ўтамиз, аввалроқ Польша Президенти Анжей Дуда Беларусь резиденти Александр Лукашенко сабаб Бакуда бўлиб ўтган БМТнинг иқлим бўйича саммити – COP29 иштирокчилари билан суратга тушишидан бош тортган эди. Бу Беларуснинг Украина можаросидаги иштироки билан боғлиқ бўлган рамзий ажратиш сифатида баҳоланган.