МАК самолёти Ланьчжоуда фавқулодда қўнди

“Ўзбекистон ҳаво йўллари” миллий авиакомпаниясининг Пекиндан Тошкентга учаётган самолёти Хитойнинг Ланьчжоу шаҳрида жойлашган аэропортга фавқулодда қўнди.

Ўзбекистоннинг Хитойдаги элчихонаси берган маълумотларга кўра, 6 ноябрь куни маҳаллий вақт билан соат 23:50да HY-502 рейсининг Пекин – Тошкент йўналишида учаётган “Ўзбекистон ҳаво йўллари“ МАКнинг самолёти Ганьсу провинциясининг Ланьчжоу шаҳридаги аэропортга фавқулодда қўнди. Бу ҳақда ТИВ матбуот хизмати хабар бермоқда.

Қўниш йўловчилар – Ўзбекистон фуқаролари А.С., М.М., Д.А ҳамда унинг аёли ва ўғли Россия фуқароларининг соғлиги ёмонлашгани сабабли амалга оширилган. Самолёт қўниб, биринчи тиббий ёрдам кўрсатилганидан сўнг, 5 нафар йўловчилар шаҳар клиник шифохонасига ётқизилган.

7 ноябрь куни соат 5:41да самолёт Тошкентга учиб кетган.

Ўзбекистон элчихонаси тиббиёт муассасаси билан алоқа ўрнатган бўлиб, вазиятни ўз назоратига олган.