МАГАТЭ Эрон атом бомбаси  яратаётганининг аломатларини кўрмади

Халқаро атом энергияси агентлиги (МАГАТЭ) Теҳроннинг ядро қуролига эга бўлишга тайёрланаётгани аломатларини қайд этмади. Бу ҳақда агентлик бош директори Рафаэль Гросси Польшанинг “Rzeczpospolita” газетасига берган интервьюсида маълум қилди.

“Эроннинг ядровий қуролга эга бўлиши ва унинг мавжудлиги икки хил масала. Биз тақдим этган маълумотлар ҳақиқатан ҳам нозик эди, чунки у ядровий бомба яратиш учун маълум потенциални кўрсатди. Аммо бу ушбу потенциал амалга ошишини даъво қилиш учун асос бўлмайди”, дея таъкидлади Гросси.

У Теҳроннинг бундай нияти бўлган тақдирда ҳам “ойлар ва ундан ҳам кўпроқ вақт” кетишини таъкидлади. Унинг сўзларига кўра, “эронликлар ҳали бошланмаган бойитилган уранни металлга қайта ишлашлари керак эди”.

“Иккинчидан, ядро каллагига сиғадиган даражада кичик бўлиши керак бўлган жуда мураккаб тизимларнинг бутун туркумини яратиш керак”, деб тушунтирди у.

Гросси, шунингдек, Исроил Бош вазири Биньямин Нетаньяхунинг Эрон ядровий иншоотларига ҳужум қилиш қарорини баҳолашдан бош тортди ва МАГАТЭнинг вазифаси фактларни аниқлаш ва улар бўйича ҳисобот бериш эканини таъкидлади.

“Ва уларни давлат раҳбарлари қандай талқин қилишади, бу уларнинг иши. Мен бу борада ҳукм қилишни хоҳламайман”, деди агентлик раҳбари.

Бундан ташқари, у Эрон ядро дастури муаммоларини ҳарбий йўл билан ҳал қилиб бўлмаслигини яна бир бор таъкидлади.

Эслатиб ўтамиз, 13 июнга ўтар кечаси Исроил Эронга қарши ҳарбий операция бошлаганди. Орадан бир кун ўтмасдан Эрон жавоб ҳужумини амалга оширди.

Қўшма Штатлар можаро авж олганидан тўққиз кун ўтиб, урушга кирди: 22 июнга ўтар кечаси Америка қуролли кучлари Эроннинг учта ядровий объектига ҳужум қилди.

23 июнь куни кечқурун Теҳрон Американинг Яқин Шарқдаги энг йирик авиабазаси – Қатардаги Ал-Удейдга ракета ҳужуми уюштирди. АҚШ расмийларига кўра, қурбонлар ва жиддий вайроналар йўқ. Кейинроқ АҚШ Президенти Дональд Трамп Исроил ва Эрон ўт очишни тўлиқ тўхтатишга келишиб олганини маълум қилди. Ўт очишни тўхтатиш келишуви 24 июндан кучга кирди.