Мадуро адолат олдида жавоб бериши керак – АҚШ

Венесуэла Президенти Николас Мадуро ўз жиноятлари учун адолат олдида жавоб беради. Бу ҳақда АҚШ Давлат котиби ўринбосари Кристофер Ландау ижтимоий тармоқлардаги саҳифасида ёзди. 

“Венесуела учун янги давр. Золим йўқ бўлиб кетди”, дея қўшимча қилди у. 

Эслатиб ўтамиз, аввалроқ АҚШ Президенти Дональд Трамп Николас Мадуро ва унинг рафиқаси қўлга олиниб, мамлакатдан олиб чиқиб кетилганини маълум қилган эди. Шунингдек, у ушбу операция АҚШ ҳуқуқни муҳофаза қилиш органлари билан ҳамкорликда ўтказилганини, тафсилотлар кейинроқ эълон қилинишини билдирди.

Бугун, 3 январь куни эрталабдан бери Венесуэла пойтахтида ва мамлакатнинг бошқа аҳоли пунктларида портлашлар содир бўлгани ҳақида хабар берилган эди.

Бунинг ортидан Колумбия Президенти Густаво Петро Венесуэла пойтахти Каракас ҳарбий ҳужумга учраётганини маълум қилди.

Қайд этиш жоиз, 2025 йил куз бошида АҚШ Кариб денгизи ҳудудига ўзининг энг замонавий Gerald Ford авиация ташувчисини, эсминецлар ва қирувчи самолётларни юборган эди. Сентябрь ойидан буён гиёҳванд моддалар ташиётган кемаларга зарбалар берилмоқда. АҚШ Президенти Дональд Трамп маъмурияти Николас Мадурони Венесуэланинг ҳуқуқий президенти сифатида тан олмайди ва мамлакат ҳукуматини наркотрафикка қарши етарлича кураш олиб бормаётганликда айблайди.

17 декабрь куни Трамп Венесуэлага бораётган ва ундан чиқаётган, санкциялар остидаги барча нефть танкерларини тўлиқ блокадага олиш буйруғини берганини эълон қилган.

Сентябрь бошида CNN Трамп Венесуэла ҳудудидаги наркокартелларга зарба бериш вариантини кўриб чиқаётганини хабар берган эди. Бироқ ноябрь ўрталарига келиб, Трамп Венесуэлада қуруқликдаги ҳарбий операция ўтказиш ёки ўтказмаслик бўйича ҳали қарор қабул қилмагани маълум қилинган.