Линдси Грэмнинг ўлими сабаби маълум бўлди

АҚШ сенатори Линдси Грэм атеросклероз оқибатида юзага келган аорта ёрилиши сабаб вафот этгани маълум бўлди. Бу ҳақда Колумбия округи суд-тиббий экспертиза идораси эълон қилган дастлабки хулосасида келтирилган.

АҚШнинг Жанубий Каролина штатида сайланган республикачи сенатор Линдси Грэмнинг ўлимига атеросклероз фонида ривожланган аорта дисекцияси (аортанинг ёрилиши) сабаб бўлган. Қайд этилишича, 71 ёшли сенатор жорий йилнинг 11 июль оқшомида Вашингтондаги уйида қисқа ва тўсатдан юзага келган хасталикдан сўнг вафот этган. Бироқ токсикологик ва микроскопик текширувлар якунлангач, ўлим тўғрисидаги якуний хулоса эълон қилинади.

Маълумот учун, Линдси Грэм АҚШ Конгрессида 30 йилдан ортиқ фаолият юритган. У 1995–2003 йилларда Вакиллар палатаси аъзоси, 2003 йилдан буён эса Сенат аъзоси бўлиб ишлаган. Сўнгги йилларда Сенатнинг Бюджет қўмитасига раислик қилган ва яқинда бешинчи муддат учун Республикачилар партияси праймеризида ғалаба қозонган эди.

Сенатор вафотидан бир кун аввал Украинага ташриф буюриб, Президент Владимир Зеленский билан учрашган ҳамда Россияга қарши санкцияларни кучайтириш ва Киевни қўллаб-қувватлаш масалаларини муҳокама қилган.

АҚШ Президенти Дональд Трамп Грэмнинг вафоти муносабати билан ҳамдардлик билдириб, уни мамлакатнинг энг нуфузли сенаторларидан бири деб атаган. Шунингдек, Трамп жорий йилнинг 18 июлига қадар федерал биноларда давлат байроқларини ярим устунга туширишни буюрган.