Линда Носкова илк бор Уимблдон чемпионига айланди

Чехиялик теннисчи Линда Носкова Лондондаги майса қопламали кортларда ўтказилган мавсумнинг учинчи “Катта дубулға” турнири — Уимблдон мусобақасида ғолиб чиқди.

Кеча, 11 июль куни бўлиб ўтган финал баҳсида дунёнинг 12-рақеткаси ҳисобланган Носкова ўз ватандоши, рейтингда 9-ўринни эгаллаб турган Каролина Муховани 6/2, 5/7, 6/3 ҳисобида мағлуб этди.

Учрашувнинг иккинчи сетида Мухова 2/5 ҳисобида ортда бораётганига қарамай, бешта чемпионлик очкосини сақлаб қолиб, сетда ғалаба қозонди. Бироқ ҳал қилувчи учинчи сетда Носкова устун келиб, чемпионликни расмийлаштирди.

21 ёшли Линда Носкова фаолиятидаги илк “Катта дубулға” бош совринини қўлга киритди. Унинг бунгача эришган энг яхши натижаси 2024 йилги Австралия очиқ чемпионати чорак финали эди. Бу ғалаба чехиялик теннисчи учун WTA турниридаги учинчи чемпионлик бўлди.

29 ёшли Каролина Мухова эса фаолиятида иккинчи бор “Катта дубулға” турнири финалига чиқди. У 2023 йилги “Ролан Гаррос” финалида польяк теннисчиси Ига Швёнтекка мағлуб бўлган эди.

Маълумот учун, “Катта дубулға” турнирлари тарихида илк бор Чехиянинг икки нафар теннисчиси аёллар яккалик баҳслари финалида ўзаро тўқнаш келди. Шунингдек, бу 2017 йилги US Open мусобақасидан бери бир мамлакат вакилалари иштирок этган илк аёллар финали бўлди. Ўшанда америкалик Слоан Стивенс финалда ватандоши Мэдисон Киздан устун келган эди.