Ле Пен суд қарорига қарамай президентликка номзодини қўймоқчи

Тўрт йиллик қамоқ жазосига ҳукм қилинган ва беш йилга давлат лавозимларида ишлаш тақиқланган Марин Ле Пен суд қарорига қарамай, Франция президентлигига номзодини қўйиш ниятида. Бу ҳақда у кеча, 31 март куни Франциянинг TF1 телеканалига берган интервьюсида айтди. 

“Мен жангчиман, ўзимни йўқ қилишларига йўл қўймайман”, деди Ле Пен.

Суҳбат давомида у “ҳеч қандай шароитда” сиёсатни тарк этмаслигини ҳам айтди.

“Қисқа йўл бор. Албатта, у тор, лекин у мавжуд”, дея фикр билдирди ўта ўнгчи сиёсатчи 2027 йилги сайловларда Франция президентлигига номзодини қўйиш имконияти ҳақида.

Марин Ле Пен суд қарорини сиёсий ва ноқонуний деб атади.

“Бугун тунда миллионлаб французлар инсон ҳуқуқлари мамлакати бўлмиш Францияда судялар авторитар тузумларнинг ваколати ҳисобланган усуллардан фойдаланаётганини кўриб, ғазабда, ишониб бўлмас даражада ғазабда”, деди у.

Оммавий сўровларга кўра, Ле Пен Франциядаги президентлик пойгасида фаворит бўлган.  Шундай қилиб, март ойи охирида Франция жамоатчилик фикри институти (IFOP) томонидан ўтказилган тадқиқот шуни кўрсатдики, фақат овоз беришнинг биринчи босқичида сайловчиларнинг 34% дан 37% гача қисми уни қўллаб-қувватлашга тайёр. 2022 йилги сайловларда у биринчи турда 23,15 фоиз овоз олган.

Марин Ле Пенга чиқарилган ҳукм

“Миллий бирлик” партияси парламент гуруҳи раҳбари Марин Ле Пен, партиядан 8 депутат ва 12 депутат ёрдамчиси қонун чиқарувчи орган маблағларини ўзлаштирганликда айбдор деб топилди. Бу қарор Парижнинг ахлоқ тузатиш маҳкамаси томонидан 31 март куни қабул қилинган. Ле Пен тўрт йиллик қамоқ жазосига ҳукм қилинган, шулардан икки йили шартли равишда муддатидан илгари бекор қилинган ва у яна икки йил давомида электрон билагузук тақишга мажбур бўлади.

Бундан ташқари, унга беш йилга давлат лавозимларида ишлаш тақиқланган. Бироқ судьялар ҳайъати сиёсатчининг апелляция шикояти бўлишидан қатъи назар, тақиқ дарҳол кучга кириши ҳақида қарор чиқарди, бу Франциядаги стандарт суд амалиётига тўғри келмайди.

Ишда жами 27 киши, жумладан, Миллий иттифоқ раҳбарияти ҳам иштирок этган. Сиёсатчилар Европа Иттифоқи маблағларини суиистеъмол қилганликда ва Европарламент депутатлари ёрдамчиларини сохта ёллаш орқали партияни яширинча молиялаштирганликда айбланган.

Ҳукмдан кейин Италия Бош вазири ўринбосари Маттео Сальвини, Венгрия Бош вазири Виктор Орбан ва Нидерландиядаги ҳукмрон коалиция таркибига кирувчи ўнг қанот “Озодлик” партияси раҳбари Герт Вилдерс Марин Ле Пенни қўллаб-қувватлашини билдирган.