Ла Лигада 9-тур учрашувлари якунланди

Кеча, 19 октябрь куни Испания Ла Лигасининг 9-тур учрашувлари якунига етди. Турда пешқадам “Реал Мадрид”  “Хетафе” меҳмони бўлди ва якунда 2 нафарга кам бўлиб қолган мезбонларни кичик ҳисобда мағлубиятга учратди. Мадридликларнинг энг яқин таъқибчиси “Барселона” ўз майдонида ҳамшаҳарлари “Жирона” устидан зафар қучди. Кейинги турда бу икки жамоа тўқнашувидаги “Эль-Класико” бўлиб ўтади.

Ла Лига 9-тур учрашувлари тафсилотлари билан танишинг:

“Реал Овиедо” 0:2 “Эспаньол”

“Эспаньол” меҳмонда ишончли ўйин кўрсатиб, иккита гол урди. “Овиедо” эса ҳужумда ўз имкониятларидан фойдалана олмади ва якунда мағлубиятга учради.

“Севилья” 1:3 “Мальорка”

“Мальорка” кутилмаган тарзда сафарда ишончли ҳисобда ғалаба қозонди. “Севилья” ҳимояда кўп хатоларга йўл қўйди ва мухлислар қаршисида рақибга имкониятни бой берди.

“Барселона” 2:1 “Жирона”

“Барселона” дастлаб ҳисобни очишга эришди, лекин орадан кўп ўтмай ҳамшаҳарлари ҳисобни тенглаштиришга муваффақ бўлди. Учрашув сўнгига қадар “Барселона”  узоқ вақт ҳисобни ошира олмади, аммо сўнгги дақиқалардаги голи эвазига ғалабани қўлга киритди. “Жирона” дурранг натижани сақлаб қолишга ҳаракат қилди, бироқ буни уддасидан чиқолмади.

“Вильярреал” 2:2 “Реал Бетис”

Бу ўйин тенг курашлар ва голларга бой тарзда кечди. Жамоалар кучли ўйин намойиш этишди. Томошабоп ўйин якунида мухлислар жанговар дурранг гувоҳи бўлишди.

“Атлетико Мадрид” 1:0 “Осасуна”

“Атлетико” ўз майдонида минимал ҳисобда ғалаба қозонди. Меҳмонлар бир неча имконият яратди, аммо улардан фойдалана олмади. Пойтахтликлар муҳим 3 очкони қўлга киритишди.

“Элче” 0:0 “Атлетик”

Бу учрашувда голлар кузатилмади. Ҳар икки жамоа ҳам эҳтиёткор ўйин намойиш этди ва бир очкодан бўлишиб олди.

“Сельта” 1:1 “Реал Сосьедад”

Бу учрашувда ҳам жамоалар тенг курашда ўйнашди. Ҳар иккала томон ҳам бир мартадан гол алмашиб олишди ва якунда дуранг натижа билан бир очкодан қўлга киритишди.

“Леванте” 0:3 “Райо Вальекано”

“Райо Вальекано” меҳмонда жуда кучли ўйин кўрсатиб, йирик ҳисобда ғалаба қозонди. “Леванте” ҳимояда жиддий муаммолар сабаб  аламли мағлубиятни қабул қилиб олди.

“Хетафе” 0:1 “Реал Мадрид”

Турнир жадвали пешқадами “Реал Мадрид” меҳмонда кичик ҳисобдаги ғалабага эришди. “Хетафе” ўйин давомида яхши ҳаракат қилди, аммо икки киши кам бўлиб қолган мезбонлар якунда мағлубиятга учради.

“Алавес” – “Валенсия”

Бу ўйин бугун, 20 октябрь куни бўлиб ўтиши режалаштирилган.

Маълумот учун, якунига етган тур учрашувларидан сўнг, Мадриднинг “Реал” жамоаси турнир жадвалида 24 очко тўплаган ҳолда пешқадамлик қилмоқда. Уларнинг энг яқин таъқибчиси – “Барселона” жамоаси 22 очко билан 2-ўриндан жой олган бўлса, кучли учликда “Вильярреал” 17 очко тўплаган ҳолда бормоқда. Навбатдаги тур учрашувлари жорий йилнинг 25 октябрь куни старт олади.