Кутубхонада отишма бўлди. Қурбонлар бор

Бугун, 23 июнь куни АҚШнинг Калифорния штати шимолидаги кутубхонада юз берган отишма оқибатида икки киши ҳалок бўлди. Гумондор эса қўлга олинган. Бу ҳақда “Associated Press” хабар берди.

Полиция ходимлари Бутте округи кутубхонасининг Чико филиалига кирганида, гумондор биноларнинг орқа қисмидан қочиб кетган. Бироқ кутубхона ортида жойлашган ҳуқуқни муҳофаза қилувчи органлар ходимлари уни тез орада қўлга олган.

“Бугунги воқеа жуда қайғули. Бу кўплаб одамлар ва жамиятимиз учун оғир руҳий зарба бўлди”, дейди Чико шаҳри полицияси бошлиғи Олдриж матбуот анжуманида.

Ҳодисадан сўнг кутубхона атрофидаги кўчалар вақтинча ёпилган. Бинода бўлган фуқароларни яқинлари билан учраштириш учун махсус марказ ташкил этилган.

Шунингдек, бир нафар бола енгил тан жароҳати билан шифохонага олиб кетилган.

Полиция бошлиғи ҳодисадан кейин жамоатчилик учун жиддий хавф йўқлигини билдириб, тергов ишлари давом этаётганини маълум қилган.

Ҳозирча гумондорнинг шахси ва отишмага нима сабаб бўлгани ошкор этилмаган. Ҳалок бўлганларнинг исмлари ҳам яқин қариндошлари хабардор қилинмагунча эълон қилинмайди.

Эслатиб ўтамиз, аввалроқ АҚШнинг Иллинойс штати Чикаго шаҳрида номаълум шахслар отишма содир этгани оқибатида камида 13 киши жароҳатланганди.