Кубада яна тўлиқ блэкаут юз берди

Кубада яна электр энергияси бутунлай ўчиб қолди. Бу ҳақда кеча, 21 март куни мамлакат Энергетика вазирлиги Х ижтимоий тармоғида хабар қилди.

“Миллий электр таъминоти тизими тўлиқ узилди. Аллақачон уни қайта тиклаш протоколлари амалга оширилмоқда”, дейилади хабарда.

Ушбу блэкаут АҚШ томонидан Кубага нисбатан ўрнатилган нефть блокадаси фонида содир бўлди. Сўнгги ойларда мамлакатда ёқилғи етказиб беришдаги узилишлар ва электр энергияси билан боғлиқ муаммолар мунтазам равишда қайд этилмоқда.

Охирги ҳафталарда Кубада бир неча соатдан бир неча кунгача давом этадиган ўчишлар серияси кузатилди.

Эслатиб ўтамиз, жорий йилнинг 16 март куни Куба Миллий электр энергетика иттифоқи бутун орол электрдан узилганини, оқибатда 10 миллионга яқин аҳоли зулматда қолганини хабар қилган эди. Электр таъминотини тўлиқ тиклашга 18 мартга келибгина эришилганди.

Мамлакат Президенти Мигель Диас-Канел халққа мурожаатида Кубага уч ойдан бери ёқилғи етказиб берилмаётганини таъкидлаган. LSEG кемаларни кузатиш тизими маълумотларига кўра, жорий йилда Куба бор-йўғи иккита кичик нефть ташувчи кемани (Мексика ва Ямайкадан) қабул қилган.