Кубада тўртинчи бор тўлиқ блекаут юз берди

Кубада кеча, 10 июль куни яна бутун мамлакат бўйлаб электр энергияси бутунлай ўчиб қолди. Бу жорий ҳафта ичида кузатилган иккинчи йирик блекаут бўлди. Бу ҳақда “Associated Press” хабар берди.

Маълум қилинишича, электр энергияси тизимидаги узилиш Санта-Клара ва Санкти-Спиритус провинцияларини боғловчи электр узатиш тармоғидаги носозлик ортидан юзага келган. Мамлакатнинг Электр энергетикаси иттифоқи ҳодисани тасдиқлаган.

Куба ҳукумати электр тармоғининг издан чиқишига эскирган инфратузилма ва ёнилғи танқислиги сабаб бўлаётганини билдирган. Мамлакатдаги айрим электр станциялари 30 йилдан ортиқ вақтда қурилган бўлиб, улар узоқ йиллардан буён етарли даражада таъмирланмаган.

Бош вазир Мануэль Марреронинг айтишича, мамлакат кетма-кет юз берган электр узилишлари, электр станциялари учун ёнилғи етишмаслиги ҳамда бир нечта энергоблокнинг ишдан чиқиши туфайли оғир ҳафтани бошдан кечирмоқда.

Расмийлар айрим ҳудудларда электр таъминотини тиклаш ишлари бошланганини маълум қилган.

Эслатиб ўтамиз, жорий йилнинг 6 июль куни ҳам Кубада бутун мамлакатни қамраб олган йирик блекаут юз берган эди. Кечаги ҳодиса эса жорий йил бошидан буён мамлакатда кузатилган тўртинчи кенг кўламли электр узилиши бўлган.

Шу билан бирга, Куба ҳукумати АҚШнинг энергетика соҳасига қўйган чекловлари ҳам вазиятни янада мураккаблаштираётганини таъкидламоқда.