Куба Президенти АҚШни “сиёсий геноцид”да айблади

Куба Президенти Мигель Диас-Канель АҚШ маъмуриятини мамлакатга қарши нефть эмбаргоси ва кучайтирилган санкциялар сиёсати орқали “сиёсий геноцид” юритаётганликда айблади. Бу ҳақда у Куба инқилобининг 73 йиллиги муносабати билан ўтказилган тадбирдаги нутқида сўз очди.

Диас-Канель ўз нутқида АҚШ Давлат департаментининг яқинда эълон қилинган ҳисоботини танқид қилган. Мазкур ҳисоботда Куба АҚШ ҳукуматига суқилиб кириш ва Америка ҳудудидаги “чап қанот терроризмининг мисли кўрилмаган тўлқини”ни қўллаб-қувватлашда айбланган.

Шунингдек, Куба Президенти Трамп маъмурияти мамлакат ичидаги чап қарашли гуруҳларга қарши босимни кучайтирганини таъкидлаган.

“Кубани айблаш орқали улар нафақат ташқи айбдорни топишга уринмоқда. Улар бойларни янада бойитиб, камбағалларни янада қашшоқлаштираётган иқтисодий тизимдан энг кўп жабр кўраётган қатламларнинг норозилик намойишлари учун ҳам айбдор қидирмоқда”, деган Диас-Канель.

Унинг сўзларига кўра, Вашингтон “Кубага қарши сиёсий геноцидни давом эттириш учун янги баҳона изламоқда”. 

Диас-Канельнинг чиқиши Гавана ва Вашингтон ўртасидаги муносабатлар янада таранглашиб бораётган бир пайтга тўғри келди. Унинг таъкидлашича, Трамп маъмурияти жорий этган нефть эмбаргоси ва кенгайтирилган санкциялар Кубада ўнлаб йиллардаги энг оғир иқтисодий инқирозни чуқурлаштириб, мамлакат бўйлаб узлуксиз электр узилишлари ва ёқилғи танқислигига сабаб бўлган.

Президентнинг тонгдаги нутқи 1953 йил 26 июлда Фидель Кастро бошчилигидаги исёнчиларнинг АҚШ қўллаб-қувватлаган раҳбар Фулхенсио Батиста армиясига қарши илк ҳужумининг 73 йиллигига бағишланган давлат тадбирларининг бир қисми бўлди. Бу қўзғолон беш йилдан ортиқ вақт ўтгач Батиста ҳокимиятининг ағдарилишига олиб келган эди.

Кубадаги энг муҳим инқилобий байрам муносабати билан ўтказилган тадбирда минглаб ҳукумат тарафдорлари иштирок этди ва турли бадиий чиқишлар намойиш этилди.

Мамлакатдаги мисли кўрилмаган иқтисодий инқироз оқибатида, айниқса туризм ва молия соҳасида фаолият юритувчи қатор халқаро компаниялар Кубани тарк этди. Электр таъминотидаги мунтазам узилишлар билан бир қаторда, ёқилғи тақчиллиги миллий электр тармоғининг бир неча бор тўлиқ ишдан чиқишига олиб келди. Шунингдек, жамоат транспорти фаолияти издан чиққан ва ёқилғи етишмаслиги туфайли ўқув йили муддатидан олдин якунланган.

Вашингтон эса Кубадаги иқтисодий муаммолар учун мамлакат ҳукуматини иқтисодий бошқарувдаги камчиликлар ва эскирган инфратузилмага етарлича сармоя киритмаганликда айблаб келади.

Диас-Канель нутқи якунида санкциялар ва нефть эмбаргосини бекор қилишга чақирган ҳамда Кубага гуманитар ёрдам юборган халқаро ташкилотларга миннатдорлик билдирган.

“Кубани тинч яшашига имкон беринг. Шунингдек, тарихан бошқа халқларнинг инсон ҳуқуқлари учун ҳеч қандай мукофот кутмасдан, кўпинча таъқиб, қамоқ ва ҳаётини хавф остига қўйган ҳолда курашган Америка халқининг энг олийжаноб вакиллари ҳам тинч яшашига имкон беринг. Куба на АҚШ, на ер юзидаги бошқа бирор давлат учун таҳдид эмас.”, деган у.

Эслатиб ўтамиз, аввалроқ Куба Президенти Мигель Диас-Канель Оқ уй раҳбари Дональд Трампнинг мамлакат шаънига айтган баёнотларига муносабат билдирган ва АҚШ билан юзага келиши мумкин бўлган низо тайёргарлик кўраётганини айтганди.