Кремль Украина билан ҳудудлар алмашинувини рад этди

Россия томонидан эгалланган ҳудудларни Курск вилоятининг босиб олинган ерларига алмаштириш ҳеч қачон юз бермайди. Бу ҳақда Россия Президенти матбуот котиби Дмитрий Песков маълум қилди.

“Бу мумкин эмас. Россия ҳеч қачон ва ҳеч қандай шароитда ўз ҳудудининг алмашинуви масаласини муҳокама қилмаган ва қилмайди. Албатта, украин ҳарбий тузилмалари бу ҳудуддан ҳайдаб чиқарилади, йўқ қилинмаганлар ҳам қувиб чиқарилади”, деди Песков.

Қайд этиш жоиз, Украина Қуролли кучлари ўтган йилнинг 6 августида Курск вилоятига бостириб кириб, дастлабки икки ҳафта ичида 1300 квадрат километр ва тахминан 100 та аҳоли пунктини эгаллади. Январь охирига келиб, Украина армияси назорати остида 439,5 квадрат километр ҳудуд қолган эди. Йил бошида эса Украина уч йўналишда ҳужумга ўтишга уринди ва улардан бирида уч километр олдинга силжиди. Февраль ойида Украина армияси иккинчи бор ҳужум уюштириб, мудофаа чизиғини ёриб ўтди ва Россия ҳудудига беш километр чуқурликда илгарилади.

Россия Президенти Владимир Путин армияга Украинани Россия ҳудудидан “ҳайдаб чиқариш” талабини бир неча бор оммага эълон қилган, аммо январь ойида Курск вилоятини тилга олишни тўхтатди, чунки бу борада кўзга кўринган натижалар бўлмаган. Украина Президенти Владимир Зеленский эса Россия ҳудудига бостириб кириш “нафақат адолатли, балки мамлакат ва умуман Европада ҳаётни ҳимоя қилиш учун самарали” эканини айтган. Унинг сўзларига кўра, бу босқинчилик Россиянинг заифлигини бутун дунёга, аввало Глобал Жануб мамлакатларига кўрсатган. Украина етакчиси, шунингдек, Киев Курск вилояти омилидан Кремль билан бўлиши мумкин бўлган тинчлик музокараларида фойдаланиш ниятида эканини ҳам қайд этган.

Эслатиб ўтамиз, аввалроқ Владимир Зеленский Киев Курск вилоятида Украина Қуролли кучлари томонидан эгалланган ҳудудларни Россия армияси назорати остидаги украин ерларига алмаштириш ниятида эканини билдирган эди. Шунингдек, Зеленский Россия билан музокараларга тайёр эканини, бироқ ўз мамлакати кучли позициядан туриб ҳаракат қилишини исташини билдирди.