Зеленский Курскнинг бир қисмини Украина ерларига алмаштирмоқчи

Украина Президенти Владимир Зеленский Россия билан музокаралар олиб борилган тақдирда Москвага Украина Қуролли кучлари назоратидаги Курск вилоятидаги ҳудудларни Россия армияси назорати остидаги Украина ерларига алмаштиришни таклиф қилишини тан олди. Бу ҳақда Зеленский Британиянинг “The Guardian” нашрига берган интервьюсида айтиб ўтди.

“Биз бир ҳудудни бошқасига алмаштирамиз”, деди Зеленский.

У Киев Курск вилоятининг бир қисми ўрнига Россия томонидан босиб олинган ҳудуднинг қайси қисмини сўрашини ҳозирча билмаслигини айтди.

“Билмайман, кўрамиз. Аммо бизнинг барча ҳудудларимиз муҳим, бу ерда устуворлик йўқ”, деб таъкидлади Украина Президенти.

Зеленский Россия билан музокараларга тайёр эканини, бироқ ўз мамлакати кучли позициядан туриб ҳаракат қилишини исташини билдирди.

Шунингдек, Президент америкалик компанияларга Украинани тиклаш бўйича шартномалар ва инвестицияларни рағбатлантиришга тайёрлигини таъкидлади. Зеленскийнинг сўзларига кўра, урушни тугатиш учун Киев нафақат Европадан, балки АҚШдан ҳам хавфсизлик кафолатларини олиши керак.

АҚШнинг миллий хавфсизлик бўйича маслаҳатчиси Майкл Уолтц NBC телеканалига берган интервьюсида Вашингтон урушни тугатишдан манфаатдор, бироқ Киев учун хавфсизлик кафолатлари масаласи Европага ишониб топширилишини айтган эди.

АҚШ Президенти Дональд Трамп, ўз навбатида, Оқ уй нодир ер металлари эвазига Украинага ҳарбий ёрдамни давом эттиришга тайёрлигини билдирди.

“Bloomberg” агентлигининг хабар беришича, АҚШ Молия вазири Скотт Бессент шу ҳафта Украинага ташриф буюриб, Вашингтоннинг Украина минерал ресурсларига киришини муҳокама қилади. Бу Трамп маъмурияти расмийсининг Киевга илк сафари бўлади.

Зеленский, ўз навбатида, февраль ойи бошида Украина металл қазиб олиш бўйича ҳамкорликка тайёр эканлигини маълум қилган эди. 

2024 йил август ойида Украина ҳарбийлари Курск вилоятининг бир қисмини эгаллаб олди. Олти ойлик жанглардан сўнг Россия армияси ҳудуднинг бир қисмини қайта назоратга олишга муваффақ бўлди, бироқ қатор аҳоли пунктлари, жумладан, вилоят маркази Суджа ҳам Украина Қуролли кучлари назоратида.

Аннексия қилинган Қримдан ташқари, Донбасснинг муҳим ҳудудлари, шунингдек, Херьсон ва Запорожье вилоятларининг бир қисми Россия назорати остида.

Кремль аввалроқ Украина билан музокаралар олиб бориш учун ҳозирги воқеликларни ҳисобга олиш кераклигини айтган эди.

Шу билан бирга, Дональд Трамп батафсил маълумот бермасдан, Россия Президенти Владимир Путин билан телефонда гаплашганини, Америка етакчисининг сўзларига кўра, “одамлар жанг майдонида ўлишни бас қилишни хоҳлаётганини” айтди.

Трамп урушни тугатишга воситачилик қилмоқчи эканлигини айтди, бироқ ўз режаси ҳақида ҳеч қандай маълумот бермади.

10 февраль куни “Fox News” телеканалининг икки томонни музокаралар столига ўтказиш истиқболлари ҳақидаги саволига Трамп бунинг имкони борлигини ва ўтган ҳафтада “катта тараққиёт”га эришилганини айтди.

Кремль ҳам Украина бўйича АҚШ билан алоқалар сони ортганини эълон қилди.